Bekal pemakai dijamin chukup

SERIAN: Menteri Dagang Dalam Menua enggau Pekara Penguna (KPDNHEP) Datuk Alexander Nanta Linggi meri jamin bekal pemakai chukup ba selampur menua taja gaya kes Covid-19 majak nambah.

Nanta madah, opis menteri iya begulai enggau Opis Menteri Dagang Entarabansa enggau Industri (MITI) sereta Opis Menteri Betanam Betupi enggau Industri Pemakai ngaul kerejasama ngambi matau enggau nentuka bekal pemakai menua ulih beretan.

“Kami deka nentuka semua bansa pemakai ulih beretan taja Covid-19 majak ngerekai berapa bulan agi,” terang iya.

Nanta madah, bekal pemakai kelebih agi baka berau makin bekurang laban Vietnam ngetuka import berau ngagai Malaysia.

Nya kebuah ku iya, sida udah bejalaika inisiatif ngulihka bekal pemakai tu ari menua bukai nentuka menua kitai enda suntuk berau.

Nanta mansutka jaku nya ba aum pemberita lebuh bejalai matau enggau ngabas Makit Basah Serian, ditu tadi.

Suara Sarawak