Berita manah, lapan hari bejurut nadai kes positif

KUCHING: Lundu betukar nyadi zon gadung pengudah 14 hari pelilih menua nya nadai ngerikod kes baru positif Covid-19 sehari tu.

Sapit Kepala Menteri ti mega nyadi chairman Komiti Penyangga Penusah Ngenyit Nengeri Sarawak (JPBNS) Datuk Amar Douglas Uggah Embas madah, bisi 36 pelilih menua di Sarawak udah dikategori zon gadung diatu.

“Lima pelilih menua ke bukai nyengkaum Kuching, Tebedu, Serian enggau Sibu mengkang ba zon kuning,” ku iya.

Uggah madah munyi nya ba aum pemberita di Begunan Dun Lama ditu, tadi.

Nangkan nya ku iya, Sarawak nadai ngerikod kes baru positif Covid-19 lalu kes positif ba nengeri tu agi 544 kes naka seharitu.

“Bisi 455 kes positif tauka 83.64 peratus udah ditemu suman lalu dikemendar pansut ari sepital.

“Tu nyengkaum 16 kes baru ke udah suman lalu dikemendarka pansut ari Sepital Besai Sarawak (SGH),” ku iya.

Suara Sarawak