Chukai asil Petroleum mengkang nitihka OMO 1958

KUCHING: Hak Sarawak ba chukai ti diungkupka ngagai asil petroleum ba nengeri tu seriris enggau pemutus ari kort.

Kepala Menteri Datuk Patinggi Abang Johari Tun Openg madah chukai ba asil petroleum di Sarawak mengkang nitihka Ordinan Perlombongan Minyak (OMO) 1958 taja Akta Pembangunan Petroleum (PDA) 1974 udah diaku ba menua tu.

“Pekara tu meseti dikeingat, PDA 1974 ukai siti pengawa besetuju tang sempekat dalam menua.

“Kitai bisi OMO 1958 ti nitihka undang-undang nengeri lalu kort mutuska nya ulih dikena di Sarawak,” ku iya.

Abang Johari madah munyi nya lebuh dirandau pemberita pengudah bejadika pengawa Sumbangsih Raya-Gawai 2020 di Wisma Bapa Malaysia ditu, tadi.

Nangkan nya ku iya, Perintah Sarawak ngaku PDA 1974 tang ba nengeri tu nya deka bepelasarka OMO 1958.

“Nya kebuah bisi sebengkah atur baru ba dalam randau sebedau dipejuraika ngagai Komiti Perunding.

“Naka ke diatu, kitai baru numbuhka komiti nya di baru Perintah Besai ke baru (Pakatan Nasional),” ku iya.

Suara Sarawak