Dua nembiak lelaki parai dilantak 4WD

SERIAN: Dua nembiak lelaki parai pengudah motosikal ditepan seduai belantak enggau sebuah entukar ba Jalai Serian Bypass kena Hari Empat tu tadi.

Ketuai Opis Pansik enggau Penerit Adat Trafik Sarawak, Supt Alexson Naga Chabu madah, penusah tu nyadi lebuh sebuah entukar 4WD Toyota Hilux belantak enggau motosikal urung pukul 8.10 malam.

Ku Alexson, dua nembiak lelaki ke parai nya bela beumur 18 taun, peranak menua tu empu.

“Nitihka penerang, penusah tu nyadi lebuh deriba entukar 4WD nya nguji nyeliah dua buah motosikal ke datai ari mua ti nengah kededua jalai.

“Deriba nya nguji nyeliah ke sepiak kanan lalu ngelantak motosikal ditepan seduai nya ba jalai nuju Sri Aman,” ku iya ba sebengkah penerang, ditu tadi.

Kededua nembiak lelaki nya balat bakal ba pala ngujungka seduai parai tekala nya ba endur penusah nyadi ti ditukuka piak Sepital Serian pengudah meresa seduai.

Berebak enggau nya, Alexson madah, deriba entukar 4WD iya nya siku lelaki peranak menua tu beumur 40 taun benung ba rantau jalai ari Taman Pasir nuju Balai Ringin.

Ku iya, kes nya diatu agi dipansik di baruh Seksyen 41 Akta Pengangkutan Jalan 1987.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak