Gawai ulih dirami dedini endur, ukai semina ba rumah panjai

KUCHING: Raban bansa Dayak ba nengeri tu kelebih agi ba mengeri dilalau ngambika semina ngintu pengerami Gawai ba rumah diri empu aja.

Sapit Kepala Menteri Tan Sri James Jemut Masing madahka ba dedini alai kitai diau, kitai agi ulih ngintu pengerami gawai baka selama tang semina enggau diri sebilik ke semak aja.

“Pengerami Gawai tu ukai reti kitai meseti ngintu ba rumah panjai aja tang ba rumah diri empu (di mengeri) pan ulih begawai tauka miring baka selama.

“Pengawa ngabang tauka pulai ke menua lebuh gawai nya semina ngerichahka agi pengawa di rumah panjai laban mayuh bala bela ngintu pengerami nya ba rumah,” ku iya lebuh dirandau Suara Sarawak ba opis iya di Begunan Baitul Makmur ditu, kemari.

Nangkan nya ku Masing, pengawa ngabang sigi enda dikemendar lebuh ngintu pengerami Gawai sekumbang Atur Tagang Pejalai Besyarat (PKPB).

“Sebedau tu endang kitai ulih ngabang maya gawai, tang berindik ari PKPB, ngabang enda dikemendar.

“Ukai reti puluh iku aja ulih ngerampit kitai, tang enti siku udah bisi positif Covid-19, kitai ulih kena rampit igi penyakit nya.

“Nya alai ba Gawai taun tu, enda ibuh ngabang dulu ungkup pengerai diri empu. Kitai engka nadai Covid-19, tang kitai enda nemu orang bukai,” ku iya ngelalau.

Ku Masing, tu kelebih agi orang tuai laban ngembuan sistem imun ti enda kering enti dibanding enggau orang biak.

“Kitai enda nemu sapa mai igi penyakit tu, ulih nyadi siku entara kitai ba ditu, kitai enda nemu sida bisi ke enda igi penyakit nya laban nadai mantaika kelai igi penyakit,” ku iya nambah.

Masing mega nyemetak madah anang ngabang tauka ngangauka orang ngabang ngagai rumah laban kitai enda nemu nama penyakit ti dibai sida.

“Enda ngawa enti nadai ngabang taun tu asal kitai gerai tang enti penyakit tu udah ngerampit ba kitai, kitai tau bebadi nyawa lalu nadai agi begawai,” ku iya.

Ambika chunto ku Masing di Korea Selatan ke alai semua sida endang udah ditemu gerai tang lebuh siku nyereta pengawa berami, sida lalu dituntung gelumbang kedua Covid-19.

“Semina siku aja ulih ngasuh igi penyakit tu ngerekai.

“Nya alai lalau aku ngagai bansa Dayak, kita ulih ngintu Gawai begulai enggau diri sebilik ke dikelala tang anang mai orang bukai ke ukai diri sebilik enggau kita begawai.

“Enda ngawa enda rami besai lebuh Gawai laban pengerai ke digiga kitai,” ku iya nandu.

Suara Sarawak