Gerija Anglikan di Sarawak enggau Brunei bedau dikemendar dibuka

KUCHING: Gerija Anglikan di Sarawak enggau Brunei bedau dikemendar muka gerija tauka chapel ungkup besembiang seagi Atur Tagang Pejalai Besyarat (PKPB) dipejalai.

Bishop Diocese of Kuching enggau Brunei Darusalam Right Reverend Datuk Danald Jute madahka iya lantang ati lebuh beratika penyampau sida ke kena rampit igi penyakit Covid-19 majak kurang dalam kandang minggu tu, tang nya agi terang nengeri tu apin likun ari igi penyakit nya.

“Ba reti jaku bukai, Standard Atur Operasyen (SOP) ti diberi Opis Menteri Penyerakup Nasional enda relevan laban kitai enda deka muka baru gerija diungkupka pengawa sembiang sekumbang PKPB,” ku iya lebuh dirandau pemberita, tadi.

Apin lama ke udah ba sebengkah berita dipansutka Bernama, Menteri Penyerakup Menua (KPN) Datuk Halimah Mohamed Sadique madahka SOP bekaul enggau pengawa muka rumah sembiang diungkupka ngagai sida ukai Islam sekumbang PKPB deka dibantaika pagila (18 Mei).

KPN mega nambah ba siti aum bekaul enggau mayuh bengkah pengarap deka dipejalaika seharitu lalu rintai rumah sembiang ba zon gadung ti dikemendarka buka sereta ke bekaul deka dianjung ngagai KPN ba Hari Dua (19 Mei).

Nya alai, Bishop Danald madah Perintah enda ulih neruska sebarang atur ti populis.

Enti kitai agi enda dikemendarka betemu tauka begempuru, nya udah nyadi tanggungpengawa perintah beratika pekara nya enda nyadi.

Kitai udah bebendar ngabiska semua pekara ti ulih dikena nagang igi penyakit tu. Enti kitai enda mujur, nya dikira agi ba luar tikas pemujur,” ku iya.

Iya madahka pengawa besembiang deka dipejalai nengah online baka ke udah dipejalai kenyau ari Atur Tagang Pejalai (PKP), gerija ulih meri servis livestream sembiang ba sebarang maya enggau jaku ti bebida.

“Kitai besampi ngambika pengerekai igi penyakit tu ulih punas. Aram mih kitai bela berani lalu sama bediri ngelaban igi penyakit tu,” ku iya.

Suara Sarawak