Lilly ngena pengelandik nero ngangkatka pengeraja asal

NYADI siku Pengelicha Kanan Jaku English ba UiTM Samarahan enda nekul Lilly Metom ngerembaika pengelandik nero ngagai renggat ke tinggi agi.

Bulih runding bepelasarka utai ke kala dipeda lebuh nemuai tauka bejalai ba menua tu, semua asil dero Lilly endang nunda pendiau rampa menua enggau daya pengidup Pulau Borneo ti ngangkatka pengeraja menua Sarawak.

Graduet Master of Art in English Language Studies (M.A ELS) ari Universiti Kebangsaan Malaysia (UKM) Bangi, ukai semina pintar tang mega chukup landik ba tunjuk jari.

Peranak asal Lubok Antu tu landik nero bemacham bansa dero lalu suah ngulu pengawa mandangka dero ba menua luar.

Enti kitai beratika dero Lilly, semua manding magang laban iya landik bemain enggau chura, alus ba chara ngelinsu ngasuh asil dero iya chukup berega.

UTAI TUMBUH… Dero dikumbai Kemunting tu sebansa utai tumbuh ke mayuh tumbuh ba menua tu berega RM6,999.

Kebendar, Lilly nadai kala ngulu sebarang kelas tauka kus nero tang endang nemu ati diri, kira pengelandik diberi petara.

“Aku endang rindu nero kenyau ari mit taja enda kala nyereta kus seni halus. Aku ngatika diri lebuh belajar nero, ngujika keranjai jari diri empu.

“Asil dero nunda utai ke kala dipeda tauka diasai aku empu kelimpah deka ngangkatka penyelai dikembuan raban bansa Dayak di Sarawak baka Iban, Bidayuh, Orang Ulu enggau ke bukai.

“Aku mega bisi nero utai tumbuh ba kampung, pemakai enggau ngepan asal nyengkaum gaya idup peranak menua tu,” terang iya lebuh dirandau Suara Sarawak.

Entara utai tumbuh ba kampung ti bisi didero Lily iya nya burung kenyalang, bungai kemunting, puk iyuk, rampa kampung, sungai enggau ke bukai.

NGEPAN IBAN… Dero dikumbai Kumang tu mandangka ngepan asal Iban ti dijual berega RM6,999.

Lilly madahka diri berengkah nyereta pengawa mandangka asil seni nyempulang bala bukai pengudah mayuh orang madah deka meli asil dero iya.

“Bepun ari nerima mayuh peminta deka meli asil dero, dia aku gagit ati deka nyereta pengawa mandangka asil enggau bejual,” ku Lilly.

Pengelandik Lilly nero tu seikas enggau penero bukai lalu suah ngulu pengawa mandang baka The Moving Strokes, Sarawak Artists Society 34th Annual Art Exhibition, di Saradise Gallery, Kuching dalam taun 2019, Symphony – Malaysia-China Joint Art Venture, di Saradise Gallery, Kuching, 21 September 2018, Symphony – Malaysia-China Joint Art Venture, di Foshan, China enggau ke bukai.

Nambahka nya, pengawa mandang ke bukai ti kala disereta Lily iya nya, “Art for Conservation Exhibition”, with Wildlife Conservation Society, Hilton Hotel, Kuching, 20th – 22nd May 2017, “Rimba Sarawak” Art Exhibition, by Sarawak Artists Society nyerumba Rainforest World Music Festival, Hilton Hotel, Kuching enggau mayuh ke bukai.

Ngelansa silik pasal asil dero ke kala dipandang enggau dijual, iya madah rega dero nya tinggi bepelasarka rega utai dikena nero.

BAJIK… Dero dua iku anak mit dalam dero Lilly nya dikumbai Kumang Mit ke alai dua anak mit bajik amat ngerasuk ngepan Iban tu berega RM8,000.

Ku Lilly, rega kanvas manggai RM60 ngagai RM150 siti, easel RM420 seunit, chat minyak tauka akrilik RM7 ngagai RM80 siti tube nitihka chura enggau bansa iya.

“Genap dero nya mega bisi reti lalu aku suah meri nama nya ngena jaku Iban enggau jaku bansa bukai kena ngangkatka kelai bansa asal menua tu.

“Ambika chunto baka dero Kumang, Kemunting, He Ain’t Heavy, Dayung Sangon, Memory Lane, Laksa Sarawak, Majestic Seven, Green, Hydrangeas, Kumang Mit, Canopy, Forest Symphony enggau Ptchers of Paradise.

“Chunto iya, dero Dayung Sangon enggau Kumang nya mantaika ngepan asal bansa Bidayuh enggau Iban ngambi dikelala bala ti rinduka dero tu.

“Sekumbang ngaul diri ba dunya seni tu, mayuh kenang manis enggau pait kala diasaika aku kelebih agi pemar nero, ngerumban haribulan mantaika asil enggau ke bukai.

PUH…. Lilly benung nembuka dero dikumbai Kumang ti ngayanka ngepan Iban.

“Entara kenang manis, ulih nyereta pemandang renggat entarabansa ba Foshan, China.

“Lebuh ngereja pengawa, sigi bisi aja penekul tauka penanggul sebedau kitai nempa pemujur. Nya mih utai diasaika aku lebuh enggau naka ulih nembuka asil dero nya.

“Aku begunaka timpuh ti lama nembuka semua dero nya laban meseti nembuka dulu kereja tetap aku.
“Nya kebuah, siti dero ulih tembu seminggu ngagai 3 bulan bepanggai ba pengawa dikereja aku.

Ungkup penerang semua, entara dero pemadu mar ti diberi nama Game of Thrones berega RM50,000 lalu semua dero iya berega RM4,000 enggau mar agi.

Asil didero Lilly mega kala diberi ngagai Kuching Autistic Association dikena ngumpul belanja mantu anak autistik ba pelajar sida.

“Asil dero aku mega kala diberi nyadi tepa ba aum besai entarabansa baka 6th Malaysian International Conference on Academic Strategies in English Language Teaching 2019 (My_ CASELT 2019) enggau Modern Language Olympiad 2019 (MLO2019).

Besai juluk ati aku deka nyereta pengawa mandangka asil dero tu ngagai renggat entarabansa dudi hari kelimpah mai lalu ngangkatka pengeraja dikembuan ba Bumi Kenyalang tu.

KREATIF… Lilly tu siku orang ti kreatif lebuh nero bemacham dero kelebih agi bekaul rampa menua di Bumi Kenyalang.

 

TANDA KENANG… Dero Puk Iyuk tauka dikumbai Pitchers of Paradise tu udah diberi ngagai Modern Language Olympiad 2019 (MLO 2019).

Suara Sarawak