Nadai kes baru positif Covid-19 di Sarawak

KUCHING: Sarawak kemari nadai ngerikod kes baru positif Covid-19 lalu nya ngujungka penyampau bisi kes positif ba nengeri tu mengkang 522 kes.

Kelimpah ari nya, Sekretariat Komiti Penyangga Penusah Ngenyit Nengeri Sarawak (JPBNS) madah sepuluh kes positif sebedau tu udah ditemu suman sereta dikemendar pansut ari sepital, sehari tu.

Ari penyampau nya, tiga di Sepital Besai Sarawak (SGH) enggau Sepital Sibu, lalu dua ari Sepital Bintulu enggau Sepital Miri.

Naka sehari tu mega, bisi 486 kes tauka 88.04 peratus udah suman sereta dikemendarka pansut ari sepital.

Ba lansa ke sama, JPBNS madahka bisi 76 kes Pesakit Agi Dipatau (PUI) diripotka sehari tu lalu 166 kes agi nganti pemutus ari makmal.

Berebak enggau nya, JPBNS madahka bisi 6,162 peminta pejalai entara pelilih menua diterima ba 28 Indu Opis Pelilih PDRM di selampur nengeri tu.

Ari 76,130 peminta ke udah digaga kenyau 12 Mei tu tadi, bisi 69,747 peminta udah dikemendar lalu 6,383 enda dikemendar.

Suara Sarawak