Projek Jalai Besai Kedua pemansang ti diguna rayat

KUCHING: Pengawa ngaga Projek Jalai Besai Kedua siti pemansang ti diguna rayat kelebih ari ba menua pesisir, ku Kaban Kaunsil Nengeri (Adun) Lingga Simoi Peri.

Ku iya, projek ti dibelanja kediri Perintah Sarawak nya nyadi penembu ngagai jalai menua pesisir ti nyambung Pelilih Roban ngagai Kota Samarahan kelimpah ari Jalai Pan Borneo ti dibaruh Perintah Besai.

“Perintah Sarawak endang udah merati sereta nyidi guna pengawa ngaga Jalai Besai Kedua nya dulu sebedau dipejalai sereta berundingka sukut wang enggau guna rayat ba pelilih endur nya,” ku iya madah ba siti penerang, kemari.

Iya nerang bekaul enggau penerang dipansutka Presiden Parti Sarawak Bersatu (PSB) Datuk Seri Wong Soon Koh enggau Mandal Presiden PSB Dr Johnical Rayong Nyipa ti minta ngambika projek Jalai Besai Kedua diketu.

Nya alai ku Simoi, enti perambu nya dipejalai, nya deka meri empas ti enda manah ngagai rayat ba sitak iya di Sri Aman, Lingga, Sebutau enggau Maludam lalu nya baka ngenggaika guba komuniti datai ba menua pesisir.

Simoi Peri.

Ku iya, ari sukut pemanah, Jalai Besai Kedua nya deka meri penguntung ngagai rayat ba endur bekaul (Roban ke Samarahan) dalam kandang ti lama baka nambahka tikas pengidup komuniti ba endur nya ke alai mayuh entara sida nya orang betanam betupi sereta berikan.

Ba lansa ke sama ku iya, nya mega ulih ngeranchakka agi pemansang sektor dagang temuai baka Taman Negara Maludam enggau Taman Negara Sebuyau lalu nyendiaka peluang ekonomi ngagai rayat.

“Pia mega, nya ulih ngenegapka agi rampa ekonomi ba menua pesisir di Sarawak nyengkaum Lingga enggau Maludam ungkup timpuh ti lama,” ku iya.

Simoi mega nambah, siti ari pekara ti patut diperunding ti nyadi juluk nengeri maju ba taun 2030 iya nya sambung jalai alun ti manah.

Jalai pemanjai 112 kilometer tu ku iya endang ulih mandakka pejalai ari Betong (Maludam) ke Kuching ti semina dua jam aja enti dibandingka enggau empat ngagai lima jam ke diatu.

“Aku ke udah suah ngena Jalai Pan Borneo enggau jalai tebing ai ke Sri Aman enggau Betong endang deka penalai ngagai menua tu dipandakka agi lalu ngulihka rayat ngena jalai nya.

“Enti Jalai Besai Kedua tu dikinsil, sapa deka melanja semua nya enti sema nya deka dipejalaika jemah?

“Enti ukai diatu, kemaya agi? Enggau pendiau ekonomi ti enda stabil sereta politik ti enda tentu ba menua diatu, projek ngaga Jalai Besai Kedua tu deka dipejalaika ungkup timpuh ti lama lalu meri penanggul ngagai pemansang menua pesisir,” ku iya.

Simoi madah rayat mega beratika pengawa ngagai Jalai Besai Kedua tu sebagi ari chara ti deka seruran dipejalaika perintah Gempung Parti Sarawak (GPS) ba pengawa beranakka puku enggau manah ungkup pengelantang rayat.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak