Rentap ‘Raja Ulu’ ditulung Keling seduai Kumang

Nitihka cherita pengingat tuai Iban ke dikarang niang Benedict Sandin madahka Meriba enggau Busok nya entara peturun keterubah nguan menua Skrang.

Maya peturun Dayak keterubah nya mindah ngagai kandang menua baru, dia sida bisi betemu enggau peranak menua, peturun Temenggong Kadir, orang Melayu enggau orang Sumatra baka peturun ti tebilang kelia iya nya Abang Gudam siku Ketuai Minangkabau.

Orang Melayu ari menua Johor tauka dikangau Laut maya nya datai kitu laban deka ngerampas genturung pendiau ti bejalaika pengawa berikan ba sepanjai tebing sungai nya.

Orang Melayu ba tebing sungai tu nyamai begulai enggau Dayak Laut laban sida ngembuan daya idup ti sebaka.

“Lebuh James Brooke datai ba menua tu, genap sungai diuan raban bansa Melayu enggau raban Iban ti empai bisi pengarap tauka Pagan diau ba kandang menua ulu,” ku Robert Pringle dalam bup ‘Rajah and Rebels’.

MUNSUH RENTAP…Rajah Charles Brooke chukup bebendar nguji ngalahka Rentap.

Sedarka raban Iban tu siku bujang berani kempang ingatka serang sida maya bekayau dia, Orang Melayu betuaika Sharif udah ngaul kerejasama manah enggau sida.

Keterubah iya, Iban diasuh ngayuhka perau Orang Melayu lalu sida ngasaika pekara tu meri penguntung ngagai kededua piak.

Udah nya, siku Manuk Sabong Orang Kaya Dana benama Rentap sedarka iya ulih menang kediri lalu iya andal ulih bedengah ngalahka orang ribai.

Ba taun 1850, Brooke nirika kubu ba Nanga Skrang di baruh Sharif Matusin ti nyiri anak menyadi iya, William Brereton megai pengkalan menua pesisir Rajah Keterubah enggau Residen iya.

Sharif tu enda baka Brooke ke bukai nyengkaum Alan Lee, Pengajar pengarap Kristian Henry Steel enggau Charles Fox sereta Cahrles Anthony Johnson ke dichiri nyadi Rajah Kedua.

Brereton tu kebendar anak Pastor C. Brereton ti gawa ba Kuching ba Gerempung Ngerembaika Injil (SPG) tauka Gerija Anglican di baruh Pastor Francis Macdougall.

Kubu James tu didirika semak Sungai Skrang peninggi 12 kaki enggau bisi digaga parit ngelingi kubu tu sereta bisi dua meriam pemerat 18 paun diengkah ba pintu penama kubu nya.

100 iku lelaki di baruh Pengiran Matali enggau Abang Aing nyaga kubu nya kelai kandang ngelingi nya udah dikuasa Brooke enggau ba kubu nya mega gudang nyimpan senyata api enggau seterum.

Charles Brooke dalam ‘Ten Years in Sarawak’ madah, petunggal iya Brereton nya bala Brooke ti nyadi Residen nya siku orang Eropah.

Bala kedua Brooke iya nya Alan Lee dianjung ngagai Kubu Lingga, dua taun udah nya dalam taun 1852.

RAJA ULU…Mua Rentap ke didero Harun Lat.

Brereton enggau Lee dianjung ngagai kandang menua besai tu ngambika sida enda pechaya enggau nitihka orang Dayak Laut dipegai Orang Kaya Gasing, Orang Kaya Rabong enggau Rentap.

Rentap berasai enda lantang ati enggau penumbuh dua kubu tu laban tu ulih ngeruga kapal sida baka ke kala dikereja bala Brooke suba.

Lee napi penusah kena 26 April 1853 lebuh iya ngasuh soldadu Balau ngagai Kubu James laban Rentap deka nyerang enggau munaska kubu nya.

“Lee ti balat bakal enggau nadai senyata madahka perang tu meseti diputar enggau mayuh chara,” pia ku cherita ditulis S. Baring Gloud enggau Charles Bamfylde dalam ‘A Histor of Sarawak’.

Lebuh pagi 26 April 1853 maya Kayau Lintang Batang, Rentap udah nganjung dua kapal iya ngambi nyerang kubu nya.

BUKIT SADOK…Bukit Sadok kuta endur Rentap ngalahka bala Iban ti nanahka Rajah maya kayau keterubah 1857. Diperita bisi 3500 iku pengayau Dayak enggau 500 iku pengayau Laut. Siku tuai laut benama Abang Aing bin Laksamana Aminuddin balat bendar bakal.

Tang Brereton udah bekerejasama enggau soldadu Melayu ngambi ngelabuhka munsuh sida nya lalu pekara tu ngujungka mayuh bala Rentap bebadi nyawa ketegal penyarut tu.

Lebuh kapal dikena Brereton karam, Lee mindah ngagai perau mit Melayu tang iya udah dikelingi bala munsuh manuk sabung Rentap benama Layang.

Pengudah Layang enggau bala bukai engkechit ngagai kapal Lee, iya enda ulih lari tauka ngelaban laban udah dikelingi bala Layang ngujungka iya dibunuh lalu tubuh sereta ilang labuh ke sungai.

Pemati Lee tu ngasuh Charles balat sinu laban iya udah dichiri nyadi ketuai enam bulan ke udah enggau dianjung ngagai Lingga nyilih petunggal iya.

Maya kayau nya kelia, bisi utai ke nyelai nyadi semua bansa indu utai ke tau nyengat baka indu gamang, naning enggau pantak sama enggau bala Rentap ngelaban bala Rajah, tu beduduk ari kuasa Rentap ke endang sigi antu ngarung.

LUMBUNG RENTAP…Langkau alai lumbung Rentap di Bukit Sibau, Ulu Wak, Pakan.

Kelimpah ari nya, jelu enturun, burung tiung enggau jelu empeliau seruran deka madahka iya nyema bisi munsuh deka nguji ngalahka Rentap.

Asil ari pemujur munuh Lee, Rentap ngatur sebengkah pengerami besai dikumbai Gawai Antu dikena ngintu pemujur tauka masu jari bala iya udah sama enggau bedengah.

Baring Gould enggau Bamflyde madahka pengeran enggau pemerani Rentap tu engkeman amat enggau ensumbar ‘Rentap Tanah Kudi Menua’.

Ari nya, Rentap majak bekuasa sereta digelar ‘Raja Ulu’ ketegal pemerani iya, mayuh bansa Dayak begempuru lalu nyukung iya. Rentap tu tau serang numbangka menua laban iya endang bisi ditulung Keling seduai Kumang ari Panggau Libau.

Dikena ngenang pemujur iya ke udah munuh Lee, Rentap nengkebang sebengkah genteran timang enggau ensumbar iya:

“Rentap Tanah, Rentap Menua, Tuan Lee ke mati enda berega
Tuan Brereton tau masukka kain, Enda teanjungka bala Raja.
Rita Layang tampak terang, mandangka rupa,
Abang Aing badu agi ke pending bala, Undup abis tepelut leka mata,
Balau nadai agi kerangan sebelak kerapa.”

Pemarai manuk sabung Rajah – Alan Lee

Kenu ku cherita maya nya suba, pengayau ti nanahka bala Brooke dikelingi raban Dayak Laut sebedau raban Dayak tu engkechit tama ngagai perau pengayau Rajah lalu belaban.

Sebuah ari dua buah kapal Dayak Laut udah ngejang dulu ngagai perau munsuh sebedau perau ke bukai nyerang munsuh sida.

Pengudah milih endur ngalahka munsuh, siku tauka dua iku Dayak Laut tu diasuh bejalai ba sungai ti pabu ngambi ngumpan munsuh mansang ngagai endur sida ke belalai nya.

Pengudah munsuh semak, bala Dayak Laut tu tadi lalu pansut lalu nikau batu ngagai terabai sida ngambika tanggal sebedau munuh munsuh ngena sangkuh enggau ilang.

Nemu diri udah kena serang, Lee berumban madahka Brereton sida kena serang bala Dayak Laut tu udah ngelingi endur sida sebedau datai ba Lintang Batang, Skrang.

Tang Brereton ti enda arap sereta kelalu sumbung enda mendingka jaku Lee tadi lalu merintah bala iya nyerang Dayak Laut.

Baring-Gould enggau Bamflyde (1909) madah: “Brereton berumban nyerang dua buah perau nya tang Lee ngasaika dua perau nya dianjung dulu sebedau munsuh sida datai nyerang.

“Lee ti ringat laban dikumbai Brereton nadai ati berani mutus ati ninggalka kubu nya enggau soldadu Melayu ngena kapal ngagai ulu.

“Lee enggau bala bukai ninggalka kubu enggau endur nya pengudah iya dikemeli dikumbai nadai ati berani.

Enda berundingka pengelikun diri, Lee mansang nyerang munsuh enggau minta saup Brereton. Orang Melayu ti enda tentu nyikap diri semina nyereta Lee tang ngasaika diri deka alah tang bala Dayak Laut ti nanahka Brooke ngasaika utai tu semina ngumpan sida aja.

Ke bendar iya, orang Dayak udah nemu pasal perang tu enggau Brereton ngasaika diri udah dikepit kapal Bangkong Rentap enggau bala bukai ti bisi senyata nguji ngagai tebing sungai.

Tang Brereton mujur nyelamatka diri dibantu orang Melayu lebuh iya engkechit ari kapal nya.

Taja kru kapal Lee ngumbuk iya anang mansang semak ngagai perau munsuh ti mayuh udah nganti sida, iya belanda lalu manjung “selamatka diri kita empu, aku meseti ngelaban sida,”.

Charles Brooke dalam cherita ‘Ten Years in Sarawak’madah: “Lee keran mansang taja bala bukai bendar ngumbuk iya nyurutka diri.

Kapal iya ditiki bala munsuh enggau bala iya engkechit ngagai tebing sungai nyelamatka diri.

Tang Lee udah dikepit bala bukai ngujungka iya ulih bunuh enggau kena pumpung. Udah nya tubuh iya labuh ke sungai lalu tenggelam.

Udah nya, Charles semina tetemuka ilang Lee ke udah dibai iya ngagai Kuching.

Taja pia, nyentuk diatu nadai sapa ngenuku sekalika pala lee nya dibai Brooke tauka Layang tauka udah lenyau ba sungai nya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak