Sebana raban Asnaf, OKU di Tanjung Bijat nerima perati Norina

SIMANGGANG: Bisi lempung agi penusah diasaika raban Asnaf enggau Orang Nyelai Pendiau (OKU) ba Tanjung Bijat pengudah nerima bantu ari siku ketuai ti ngembuan ati siru.

Norina Umoi Utot nadai beragih lebuh berundingka penusah ditapi sekeda peranak dia sekumbang pengerekai igi penyakit Covid-19 ba menua tu.

“Sinu amat lebuh ngenang sida ke tuai enggau raban OKU kelebih ti datai ari ruang bilik seranta napi pemar ari sukut belanja, kelimpah mar deka mindah ketegal atur dipejalai diatu.

“Chukup sinu lebuh aku ninga jaku sebana sida, nyentuk ai mata enda berasai labuh,” ku iya.

Berindik ari nya, Norina ngena duit kuchik diri empu dikena bejalaika inisiatif nyaup peranak dia kelebih agi ba belanja dapur enggau utai diguna bukai lalu pengawa iya nerima sukung ari bala mayuh.

Norina mega sedar, kenyau ari Atur Tagang Pejalai (PKP) lalu ditampung Atur Tagang Pejalai Besyarat (PKPB), tebal agi sida ditu putus kereja sereta suntuk belanja kelimpah nadai ulih mindah bebelika utai.

“Niat kitai deka mai pengelantang enggau pengaga ngagai sida tu nyerumba ngintu hari besai, Hari Raya enggau Gawai Dayak taun tu.

“Kitai nemu pemesai reti pemeri tu ngagai sida ke amat suntuk, taja mimit tang sida ke nerima chukup gaga ati.

“Kitai mega berasai lantang meda mua sida tampak,” ku Norina lebuh dirandau Suara Sarawak.

Ungkup penerang, bisi 15 penerima ari genturung pendiau komuniti Melayu enggau Iban di Tanjung Bijat ditu udah nerima pemeri sida berengkah ari 25 Mei tu tadi.

Dulu ari nya, Tuai Rumah Joel Kion ti ngarika Norina enggau ngetuaika pengawa nganjung bantu udah ngerintaika nama bala penerima ke patut nerima bantu.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak