Strategi ekonomi mungkur semua sektor

BETONG: Strategi ekonomi dirintai Kepala Menteri Datuk Patinggi Abang Johari Tun Openg diperati mungkur semua pengawa.

Kaban Parlimen Betong, Datuk Robert Lawson Chuat, madah, tu nyengkaum nyaga ekonomi rama ba mengeri enggau menua pesisir pengudah Covid-19.

Ku iya, rintai strategi sekali tu ngempung penemu baru ti ulih dikereja nipakka gaya idup baru sekumbang Atur Tagang Pejalai (PKP) diterit.

“Pekara pemadu beguna, kitai berundingka gaya idup baru bepelasarka utai ke nyadi ba Sarawak enggau PKP ti dipejalai berindik ari pengerekai igi penyakit Covid-19 diatu.

“Perintah Sarawak mega beratka pengawa mai raban peribit enggau akademik sereta profesional ngambi bagi mulaika baru pemanah ekonomi menua kitai,” ku iya.

Lawson madah, iya empu meri sukung penuh pemutus Perintah Sarawak merambu chara ti patut enggau baru dikena ngidupka baru ekonomi menua berengkah ari taun 2021 nyentuk 2030.

Perambu silik ngaul semilan strategi engkeman amat dikena nyapai ekonomi rama ti sebela lalu ulih dikereja lebuh perintah kitai minta sanding penemu raban bepenau lebuh ngelangkar program ekonomi.

“Ba runding aku, inisiatif perintah tu patut diterima enggau disukung semua sektor.

“Kerejasama rat semua piak nentuka strategi ke dilangkar deka ulih dipejalai lalu mai pangka nitihka perambu asal, meri pengelantang ngagai semua kitai,” ku iya ke mega Chairman Kaunsil Penyangkai Kapal Bintulu lebuh dirandau.

Suara Sarawak