Terima kasih, Selamat Hari Pengajar

Hari Pengajar ti diintu kena 16 Mei ninting taun nya kelai kitai ngenang pemanah enggau pengepuh bala pengajar ngiri penemu ngagai semua kitai.

Kelimpah ari apai indai di rumah, sida pengajar mih entara orang ke chukup besai reti ba pengidup kitai laban udah mayuh ngiri penemu ke beguna dikena nyapai juluk ati jemah.

Jasa bala pengajar ba pengidup sesiku orang ba dunya tu nyangka enda ulih dibalas enggau duit ringgit. Nya alai, beserimbai enggau Hari Pengajar munyi tu ku pesan sekeda raban nembiak sekula di menua tu.

KATE HELENA JULIT

“Selamat Hari Pengajar ngagai semua bala pengajar. Terima kasih udah ngembing kami. Penyabar enggau pengepuh kita ngiri penemu seruran dikeingatka. Terima kasih mayuh, Selamat Hari Pengajar!”

SELINA SENDIE ROSE

“Aku deka meri terima kasih ngagai semua pengajar laban sida sempama baka lampu nyuluh ti meri penampak dikena kita ngiga penemu ninting hari. Arapka semua bala pengajar meruan gerai sereta gayu guru nguan menua.

PATTRECYA OLLYVIA LINGKUT

“Jasa enggau pemanah kita pengajar semampai dikenang kami. Enti nadai pengajar tentu kami tusah deka teulihka pemujur. Aku besampi minta Tuhan meri berekat ti belimpah ngagai semua kita pengajar.

VIOLETTA PANTAN GEORGE

“Kitai bela nemu, pangku pengawa nyadi pengajar diatu ukai muntang. Nya alai, terima kasih ngagai semua pengajar enggau pengelicha ti kala ngajar aku ari sekula primari dataika tikas universiti. Jasa enggau pemanah kita semampai dikenang.

SERAHANA DAYUT JIMMY

“Selamat Hari Pengajar nuju semua pengajar lebih ngagai pengajar ba SMK Kpg Nangka, Sibu. Terima kasih mayuh laban udah meri penemu ke pemadu beguna ngagai aku. Pia mega nyerumba PKP tu kita nadai kala leju meri latih pelajar. Pengiruh kita sekumbang PKP tu ba proses ngajar enggau belajar (PdP) kami ngena chara online chukup meransang dalam nyeliahka pandemik Covid-19. ‘Stay Safe ,Stay Home’.”

JORJANNE SAMANTHA JABIT

“Terima kasih pengajar. Taja kita enda kala ngarapka balas tang kami seruran ingatka jasa kita. Sapa mih kami, enti nadai bala kita pengajar. Pesan aku nuju bala kitai ke agi belajar patut bebasaka bala pengajar baka kitai bebasaka apai indai diri. Selamat Hari Pengajar ngagai bala pengajar ti kala ngajar aku ba SK enggau SMK St Teresa, Kuching.”

Suara Sarawak