Pengerami Gawai Dayak endang dianti genap peranak bansa Dayak di Sarawak sebaka enggau hari besai bansa bukai.

Gawai Dayak diintu ninting 1 enggau 2 June dikena ngelai tembu ngetau sereta meri basa ngagai sida ke udah ngereja pengawa bumai lalu nya kebuah gawai diintu, kena meri terima kasih ngagai jereki enggau nasip ke manah sepanjai taun diberi Petara.

Ninting taun, mayuh peranak ke diau ba mengeri ngambi peluang kemisi pulai ke menua betemu enggau apai indai, kaban belayan, enggau bakih sida ketegal lama udah enda begempuru begulai enggau pangan diri.

Siku peranak Kampung Tuba Ulu, Sebuyau, Lydia Aman, nusi ngelamatu iya endang ngintu Gawai Dayak begulai enggau sida serumah.

Ku iya, sebedau hari Gawai Dayak nyadi, tuai rumah sida benama Ngumbang Santok deka merambu mayuh macham program ke ulih diatur.

BEDURUK NGAGA KUIH… Bala indai Kampung Tuba Ulu, Sebuyau beduruk ngaga kuih tradisi sebedau ngintu Hari Gawai.

“Enti bisi peranak deka nirika pengerami melah pinang nyerumba gawai, sida patut netapka haribulan sebedau tauka pengudah hari Gawai nyadi, ngambika pengerami enda beserak.

“Kelimpah ari nya, bala sida ke indu mega deka kiruh begagaka macham bansa kuih gawai seminggu tauka dua minggu apin pengerami nya diintu ngena chara beduruk.

“Kuih asal bansa kitai baka penganan jala, kuih chelak, kuih sepit endang enda tau enda digaga nyerumba Gawai,” ku iya nusi.

Pengerami Gawai enda tau enda bisi ai tuak lalu ba peranak Kampung Tuba empu, ai tuak meseti disedia dulu dua tauka tiga bulan sebedau Gawai nyadi tauka pengudah pengawa ngetau tembu.

Ku Lydia, mayuh macham bansa tuak digaga peranak rumah panjai sida tang meseti ngena berau pulut.

UTI GAWAI… Ranyai didirika ba tengah ruai dikena ngerami Hari Gawai.

“Sida ke nutuk tepung berau pulut tumu agi nyendiaka diri ngaga kuih gawai laban pengawa nutuk tepung dataika nyadi kuih endang lama.

“Sebedau pengerami Gawai diintu, sida ke indu nyengkaum bala indu dara deka beguai ke salon, ngantaka diri ngintu Gawai.

“Bisi mega sekeda beduruk muai bulu mua ngena ubung ngambika kulit mua alus dipeda,” ku iya seraya ketawa lebuh ngenang leman pengawa sida serumah sebedau Gawai.

Kelimpah ari nya ku iya, bala anak ke diau jauh di mengeri deka mulaika diri kemisi sebedau 31 haribulan.

“Ba menua kami, Gawai deka diintu chukup pengerami tauka besai genap lima taun sekali lalu lebuh gawai tu diintu endang rami agi ari ke selama.

“Mayuh macham program diatur lebuh Gawai besai nya diintu lalu kami deka berami gawai pengelama tiga hari tiga malam bejurut. Maya nya semua peranak rumah panjai meseti pulai ke menua.

“Kebuah pia laban timpuh lima taun ke diberi dikena begigaka belanja disadang chukup kena mulaika diri maya Gawai,” ku iya nerang.

Lebuh malam 31 haribulan, semua peranak rumah panjai lalu begempuru lalu program lemai nya berengkah.

Entara program ti udah diperambu baka ngajat, chabut tikit benasip, lagu pelanja sereta live band.

Pukul 12 tengah malam 31 haribulan, semua peranak rumah panjai deka begempuru ba siti ruai ngambika sama nyeradak ai pengayu. Tawak lalu dipangkung nandaka taun kitai Iban berengkah ba taun ke baru.

RAMI… Bala pengabang ti datai ngajat lalu ngetas buah ranyai ke dipilih sida.

“Tuai rumah deka besampika genap peranak rumah panjai bulih rejeki mayuh agi ari taun ke udah kelebih agi sida ke bumai bekebun, sida ke gawa perintah enggau kompeni niki pangkat enggau gaji, besampika anak sekula pandai magang sereta ke bukai lalu pengerami terus diintu nyentukka pagi siti,” ku iya.

Ku Lydia, lebuh Gawai besai sida serumah ke diintu lima taun sekali nya, sida deka miring meri petara makai lalu nirika ranyai maya siang hari 31 haribulan.

Kena 1 June, rumah panjai sida deka nerima pengabang ari rumah panjai ulu enggau ili lalu sebedau niki ke rumah panjai, babi deka disayat ba pala tangga rumah panjai.

“Temuai meseti tama nunga mata panas idup, sida bujang dara enggau ke tuai ngena ngepan ngelaluka penemuai sida lalu nyadung ai tuak.

“Lebuh ngelaluka pengabang, tabuh ngajat berengkah dimain peranak rumah panjai lalu pengabang diiring niti ruai.

WONG RADAK… Palan dagang temuai genturung pendiau nya suah nyadi endur ngelantangka ati pengudah Kampung Tuba Ulu ngintu pengerami gawai tiga hari tiga malam.

“Pengudah semua pengabang niki ke ruai, main baka ajat sereta kuntau deka dibantai sebedau pengabang dinah enggau pemakai,” ku iya.

Pengabang deka ngelingi ranyai lalu ngetas buah ranyai ke dipilih sida. Kenaka 2 enggau 3 haribulan, baru kami serumah deka beduruk ngabang ngagai rumah bukai tauka kaban belayan sida, ku Lydia.

Udah nya ku iya, sida mega bisi manggang sereta mandi ba ai wong Radak, semak enggau rumah panjai nya pengudah dua tiga hari rami gawai.

“Pengawa tu chukup ngerinduka ati bala nembiak laban ulih mandi ba ai wong nya kelimpah digaga ninting taun dikena ngerami palan dagang temuai rumah panjai.

“Ba endur tu endang bisi mayuh servis digaga peranak rumah panjai nya dikena bemalam baka jamban, dapur alai temuai berapi sereta injin api dikena sida,” ku iya.

Enti nitih endang taun 2020 peranak Kampung Tuba Ulu, Sebuyau deka berami gawai besai laban sida udah baum tumu merambu mayuh bengkah program dikena ngintu malam 31 haribulan.

Bisi sekeda sida udah bebelika tikit bilun enggau bas lalu ngatur pejalai sida pulai ke menua laban semina kerita 4×4 aja ulih tama ke menua nya ketegal jalai ti balat jai.

Taja pia, berindik ari penusah dibai pengerekai igi penyakit Covid-19 di nuntung selampur dunya sereta Atur Tagang Pejalai Besyarat ti diteritka ba menua tu, perambu ngintu Hari Gawai dilanjarka ngagai taun siti.

“Endang berat asai anak ati nangguh semua nya laban bisi ke udah meli tikit nyau mejal sida nginsil tikit nya kaban nangika igi penyakit tu.

“Sinu mih asai ati laban enda ulih begawai begulai enggau diri sebilik kelebih agi apai indai, tang nadai ku enggau laban kitai meseti berundingka sida ke diau ba rumah panjai enggai ke kitai bisi mai igi penyakit tu pulai ke menua,” ku iya ti mega siku peranak ti begiga ke rejeki ba mengeri.

Ku iya, pengerekai igi penyakit Covid-19 sereta atur ti diberi perintah meri reti ti besai ngagai pengidup iya laban sebedau tu mayuh pengawa berega diberi petara begulai enggau orang ti dikesayau tebasau pia aja.

“Taun tu semina ngintu ba Kuching aja begulai enggau kaban sama nyuwa rumah. Iya pan berasai sinu mega laban enda ulih begawai enggau laki iya.

“Sama-sama kitai besampi ke pengerekai igi penyakit tu punas ari dunya tu ngambika kitai ulih pulai baka selama taja bejalaika pengidup ngena chara baru,” ku iya.