JULAU: Lagu Nubai Maya Gawai nerima lebih 61,000 orang meda (views) dalam timpuh empat minggu pengudah dikunsi ba channel Youtube endang nadai disadang.

Ku penengkebang leka lagu, Cr. Sangin Juat, penemu nya datai deras baka ai lalu datai kediri empu, leka lagu tembu enda datai sejam.

“Lebuh penyanyi Richard Lee, ti sebedau tu tebilang enggau lagu Nuan Berega Di Mata Ku, minta penemu ari aku pasal leka lagu, dia penemu nya nemu datai tekala nya.

“Aku mega enda ngadang penemu diri diterima lalu diangkat nyadika lagu,” ku iya lebuh dirandau Suara Sarawak sentang pemujur lagu Nubai Maya Gawai matak ati peminat.

Sangin madah, bisi dua komposer enggau iya nengkebang lagu nya, Igu Anthony enggau Richard Lee empu, lalu tiun ditusun Willie Jawi sereta dikeluarka Kaban Music Production.

Richard Lee

Iya madah, lagu tu ditengkebang nagit bala nembiak laban maya Gawai tebal agi sida nembiak ka betundi bebuti enggau pangan diri seraya negutka kaul bebakih.

“Juluk ati kira deka ngaga lagu ungkup sida ke nembiak. Nya kebuah jalai cherita lagu nya digaga bakanya, nangkup peminta raban diselinting.

“Dalam seminggu, orang ke meda lebih kurang 61,000 lalu tu timbal chukup manah ari bala mayuh. Tu mega nunjukka orang ti rinduka lagu kitai Iban majak nambah.

“Ari gaya rikod ba channel Kaban Music Production mega, mandangka lagu tu ulih diterima semua renggat umur, nadai ngira biak tauka tuai. Tu ngasuh ati kami ransing agi ngemajuka industri muzik kitai Dayak,” ku iya ti ngarapka bala peninga teperindang.

Sangin madah, taja enda begawai baka selama tang arapka bala begawai nitihka atur tauka SOP ti udah ditetap laban nadai salah betundi semina kitai enda ulih bungah baka selama.

Igu Anthony

“Aku berasai temegah ati laban siku artis tebilang udah milih aku nengkebang lega lagu ke iya.

“Ngagai bala ti udah ninga lalu meri timbal penemu ti manah ba youtube ulih pulaika peransang nengkebang lagu ka manah agi kena ngerichahka industri muzik kitai,” ku iya.

Ungkup penerang, Sangin mega bisi nengkebang leka lagu ungkup komposer bukai baka Sulu Sarawak, Tony Engkabi, Hairee Francis, Jesley Jabu enggau Clemend Man.

Ba lansa sama, Richard Lee ngandalka lagu iya ulih diterima bala peninga lalu tau meri peransang ngagai bala artis bukai ngangkatka industri muzik Dayak.

“Peransang enggau pengarap aku sama baka artis ke bukai ba siti siti lagu deka meda lagu nya ulih diterima bala peninga kelebih agi lagu Gawai.

Cr. Sangin Juat

“Kebuah pia laban tu lagu gawai keterubah ari aku. Taja taun tu kitai enda ulih berami baka taun ke udah, aku ngarap ke lagu tu bisi sambut bala peningga,” ku iya.

Kelimpah ari nya, besai pengarap Richard ulih maju enggau ngangkatka lagu Iban, besemekih enggau artis bukai ti udah dulu nyingkang ke mua ba industri tu.

Ku Richard, iya berasai gaga laban diterima ba industri tu taja agi baru lalu mayuh bala peninga semampai nganti lagu enggau album baru ari iya.

“Juluk ati aku deka mega lagu Nubai Maya Gawai tu mega deka tebilang baka lagu Nuan Berega Di Mata Ku, ti udah ngangatka nama aku ba dunya pemerindang kitai ditu.

“Pemanah sukung ngelama tu ngasuh ati aku ransing agi nyadaka lagu ti bisi kualiti, bisi reti enggau ulih nyeridi runding kitai semua kelimpah ngetanka penulin tiun enggau leka lagu nya empu,” ku iya nerang.

Berebak enggau nya, Richard meri besai terima kasih ngagai semua piak ti udah ngemujur semua pengawa dataika video lagu Nubai Maya Gawai ulih dibantai nengah channel Youtube.

“Meri terima kasih ngagai peminat ke semampai nyukung aku, meri peransang ngagai aku ari mula aku angkat masuk dunya pemerindang.

“Pia mega terima kasih besai nuju Tuai Rumah Tila Luing enggau sida serumah ba Spak Betong laban meri kerejasama rat sereta deka kiruh ngemujur pengawa ngaga video lagu tu.

“Tabi puji enggau terima kasih ngagai komposer laban udah pechaya lalu milih aku nyadaka leka lagu tu. Enda tinggal mega ngagai penusun muzik laban udah mantu ngaduka tiun lagu manah agi didinga,” ku Richard.