PERONICA LEO
NAWAN, BALINGIAN

“Selamat ngintu Gawai Dayak ngagai semua kitai. Ngarapka Gawai taun tu kitai sama bela nyaga pengelikun enggau pengerai diri empu. Sama diau jenuh ba rumah, enda ibuh ngabang nitihka atur ti dipejalai perintah. Kena manah peluang kngintu Gawai enggau diri sebilik ngena chara ti patut laban bisi sekeda kitai enda ulih pulai ke menua. Sampi aku, gayu guru gerai nyamai lantang senang nguan menua. Ohhhaa! Selamat Gawai Dayak 2020.”

TAJEM SINOK
SELANJAN SEBEMBAN, LACHAU

“Bekirum pesan ngagai apai indai, bala menyadi sendi sereta kaban belayan di menua. Meri selamat ngerami Gawai Dayak Taun 2020. Baka kami ke benung gawa ba tasik diatu semina ulih bekirum pesan aja lalu nyampika semua kitai bulih berekat ari Petara, betuah belimpah chelap lindap nguan menua. Jaga mih pengerai enggau pengelikun sereta titihka atur ke udah ditetap perintah pulaika pengelantang semua kitai.”

JACKSON ENTILI MIRINGGAI
SG SALIM BELALANG, SIBU

“Taja bisi bida ngintu hari besai taun tu tang aku ngarapka semua kitai raban bansa Dayak bulih berekat enggau diau lantang. Sama nyaga pengelikun diri laban dunya agi sigau diatu. Tebal agi kitai ke gawa ba mengeri enda ulih pulaika menua lalu pia mega sida ke diau ba menua enda ulih ngusung pangan diri baka Gawai Dayak ke udah ketegal pandemik Covid-19. Sampi aku ngarapka semua kitai semua gayu guru gerai nyamai nguan menua kelebih agi ngagai kami serumah ba Rumah Akul, Salim Belalang. Selamat ngerami Gawai Dayak 2020.”

JAGQUELINE TIMAI UNJI
NG SELAUT TENGAH, JULAU

“Selamat ngintu Gawai Dayak ngagai semua kitai lalu ngajihka pengidup kitai betuah belimpah, gerah mudah bulih jereki lebih ari taun ke udah, sida ti bedagang bulih untung, sida ke bujang dara deka bulih tawing ke menyana, sida ke sakit deka pulai gerai baka selama, sida ke tuai deka gayu guru nguan menua, sida ke nembiak bulih utai dijuluk ati sereta mujur ba pelajar sekula lalu besampika menua kitai jampat suman ari igi penyakit Covid-19 tu. Ngarap ke gawai tu mai pengerai penyenang enggau pengelantang ngagai kitai semua.”

KORINA MANG
NG JAGOI, KANOWIT

“Aku ngarika kami sebilik meri jaku pesan selamat ngintu Gawai Dayak nuju semua kaban belayan ti ngelala, semak tauka jauh. Taja pengerami taun tu enda baka taun ke udah, ngarapka bala kitai semua sama nyaga pengerai diri empu sereta pemeresi ba ruang bilik, bejagaka pemeresi diri, nyaga penyauh takah enggau pangan diri lebuh berandau tauka duduk betunga enggau semampai nangkupka sengkabung mua lebuh mindah ari rumah. Semua SOP enda tau enda dititih sekumbang PKPB nentuka kitai ulih mutuska rantai Covid-19. Nambahka nya, kena manah bantu diberi perintah ke belanja ba utai ke patut aja. Selamat Gawai Dayak, Gayu Guru Gerai Nyamai.”

MAGDELINE JANIN
SG PELAGUS, KAPIT

“Ngena awak tu aku ka meri selamat ngintu Gawai Dayak nuju semua kaban belayan ke ngelala. Mayuh kitai pulai ke menua kelebih agi baka kami di Kapit agi dikategori Zon Gadung, nadai kes dirampit Covid-19. Taja pia, aku ngelalau mensia mayuh anang enda nyaga takah, semampai masu jari enggau ngena sengkabung mua. Pia mega nuju sida ke pulai, jaga mih pengelikun diri lebuh bekenaka perengka pengangkut ai enggau jalai darat. Ngagai bala ke jauh enda ulih mulai kediri ngagai menua aku arapka sida anang tusah ati enda begulai enggau diri sebilik ngintu Gawai. Kitai naka ulih nyaup perintah mutuska rantai igi penyakit Covid-19. Sama bejaga sereta nitihka atur ti udah ditetap perintah.”

MATHEW MUDAI
SEMEDANG BARU, MACHAN

“Meri pesan selamat ngintu Gawai Dayak nuju kami sebilik, kami serumah, kaban belayan sereta semua bala ke ngelala. Ngarapka Gawai taun tu tau mai tuah, mai limpah, mai pengerai, mai penyamai, mai pengelantang lebih ari taun ke udah. Jaku pesan mega nuju semua bala menyadi dalam Serakup Dayak Sarawak (Pedas) ke diau ba selampur menua tu. Besampika Gawai taun tu tau mai kaul penyerakup ke lebih manah sereta pengering semengat ngagai kitai niri negika hak raban bansa Dayak. Gayu ku sentuku, gerai ku sempandai, kaya raja nguan menua. Ooohaaaa!”

TR SITI JUBIDAH LANCHANG
SG ENGKABANG TENGAH, ROBAN

“Meri pesan selamat ngintu Gawai Dayak 2020 tu ngagai semua kelebih agi ngagai anak aku Macdenver Dundang Emgkamat enggau sida sebilik ti benung gawa di KERESA plantation Bintulu laban ke enda ulih pulai ke menua ketegal PKPB, besampika semua kitai deka bulih tuah betuchung baka bukit, gerai nyamai, panjai umur, betuah belimpah nguan menua. Arapka taun ke ka datai meri pengelantang sereta diberkat Tuhan belama.”

NK YONGAI
KPG LAMBIR, MIRI

“Aku deka meri selamat ngintu Gawai Dayak nuju semua bansa Dayak ti ngintu hari besai tu nadai ngira dini kita diau diatu kelebih agi nuju kami sebilik, apai indai aku, bala menyadi sereta kaban belayan. Enda ditinggal mega nuju semua peminat NK Yongai ti semampai meri sukung ngagai aku maju ba dunya pemerindang ngelamatu. Arapka Gawai taun tu tau mai limpah jereki, mudah gerah ari taun-taun ke udah. Taja Gawai taun tu engka bisi pengurang laban bisi sekeda enda ulih pulai ke menua, tang arapka kitai bela begempung ati sama bela besabar napi penguji tu. Terima enggau lapang dada, berami nitihka penetap ti udah ditaga perintah. Sama-sama kitai bejaga dikena nyeliahka diri ari dirampit lalu ngichaka igi penyakit Covid-19 jampat punas.”

PAUL SUMBANG
NG MENYEBAT, LEMANAK, LUBOK ANTU

“Pesan Gawai Dayak 2020 dituju aku ngagai bala kami semenua ba Nanga Menyebat, Lemanak din, kaban belayan jauh tauka semak, bala bakih ke ngelala sereta semua raban bansa Dayak serata menua. Aku ngarapka semua kitai bela diau lantang, likun enggau gerai belama. Nadai jaku sampi bukai ari aku, ngajihka sida ke besekula deka bulih pemandai, sida ke ngiga kereja teulih pengawa ke menyana, bulih duit ringgit, sida ke bujang dara bulih tawing, sida ke tuai bela gerai nyamai.”

POLYCARP DANSON
ENGKUDU ATAS, SARATOK

“Ngena awak tu, aku deka meri pesan selamat ngerami Gawai Dayak ngagai bala menyadi aku, kelebih agi ngagai indai aku ti pemadu aku sayau, nadai begulai mih kitai Gawai taun tu, nadai ku enggau mih, nagang Covis-19 ari nyerekai beguna agi diatu. Pia mega pesan tu dituju ngagai bala kaban belayan ba Rumah Lembang Aji, Engkudu Atas, ngagai entua aku ba Kaki Wong, pia mega bala ipar sereta kaban belayan ba Kampung Sagah, Bau. Ngagai bala kaban, bala bakih, bala bujang berani Dayak di serata menua. Aku besampi ngajihka Gawai Dayak taun tu ulih neguhka kaul diri sebilik, ulih mega ngerapat ngambi rat kaul kaban belayan engau penuh pengelantang. Ngarapka Gawai Dayak tu diintu enggau pengaga ati, jaga diri enggau manah, jaga pengerai, penglikun diri. Baka ke udah disebut aku tadi, Gawai taun tu bisi nyelai ketegal PKPB, nadai pengabang, nadai temuai, nadai berami begelumu baka selama, tang nadai ngawa ungkup pengelikun semua. Selamat Gawai Dayak 2020.”

AIDEL ANDRIA
GRAJI ATAS, BETONG

“Selamat ngintu hari besai Gawai Dayak ngagai kami sebilik sereta kaban belayan jauh tauka semak. Ngarapka semampai bulih pengelantang, gayu guru gerai nyamai ari taun ke udah. Salam lelenggau sereta sayau ari kami sebilik ke jauh di menua orang, ti enda ulih mulaika diri sama ngintu Gawai taun tu. Jaga pemeresi, pengerai enggau pengelikun diri empu, intu pengerami tu nitihka atur ti udah ditetap nentuka kitai semampai likun ari sebarang penusah.”

INSOL HARRY
BATU LINTANG, UNDOP

“Pesan lantang tu nuju semua orang ke ngelala aku kelebih agi ngagai bala menyadi, bala entua enggau ipar duai. Enda tinggal mega bala menyadi dalam Pedas enggau Dayak Bukit Kelingkang (DBK) sereta bala aku ba menua Kalimantan baka sida Pak Abet. Intu hari besai kitai Dayak tu enggau ati lantang enggau jelan pengerami nitihka SOP enggau atur berami baka udah ditetap dikena kitai nyaga pengelikun diri empu. Selamat Gawai Dayak, Gayu Guru, Gerai Nyamai Nguan Menua… Ohhaaaa!.”

VENESWELYN GITUEN
KPG LEMPAKI TENGAH MERAPOK, LIMBANG

“Kuan kinanak luk ngerayeh aco Gawai, uih mala Do aco Gawai. Merepet bang ngerayeh aco Gawai ini lutep mawang niat pad-pad dengan tetek ruma muyuh.”