KUCHING: Komiti Penyangga Penusah Ngenyit Nengeri Sarawak (JPBNS) kemari ngemendarka kedai guntin buk enggau salon bejalaika operasyen sida baru berengkah 9 June tu.

Sapit Kepala Menteri ti mega nyadi Chairman JPBNS Datuk Amar Douglas Uggah Embas madahka taja pia, semina servis nguntin buk aja dikemendarka ba kedai nya.

“Servis baka ngurut mua tauka tubuh enda dikemendar digaga ba kedai guntin buk.

“Sida ke begunaka servis nya tau ngaga kediri ba rumah diri empu,” ku iya.

Uggah madah munyi nya ba aum pemberita di Begunan Dun Lama ditu, tadi.

Nangkan nya ku iya, Standard Atur Pengawa (SOP) bekaul enggau pengawa muka baru kedai guntin buk nya deka dipansutka dalam kandang ke semak tu.

“Kitai meseti beratika kaul ditatak nyadi ba kedai guntin buk,” ku iya.

Berebak enggau nya, iya mega madahka sekeda Taman Rizab Pengeraja Asal deka dibuka baru berengkah 8 June tu.

Operasyen taman perlindungan tu nyengkaum Samajaya, Bukit Lima, Bukit Sembiling enggau Piasau sereta nitihka SOP ke udah ditetap.

Kelimpah ari nya, Uggah madahka Palan Tuisyen apin dikemendar bejalaika operasyen laban piak sida agi beratika gaya Covid-19 di Sarawak.

“Enti Sarawak udah nadai agi kes Covid-19 lalu semua pelilih ba nengeri tu udah dikategorika zon gadung, udah nya baru kami deka berundingka pekara nya,” ku iya.