KUCHING: Rayat Sarawak ti diau ba menua luar enggau tepekul jam diatu dilalau anang kakang telefon ngagai Perintah Sarawak ngambi bejalaika pengawa mantu sida pulai ke menua.

Ku penerang Sapit Kepala Menteri ti mega Chairman Komiti Penyangga Penusah Ngenyit Nengeri Sarawak (JPBNS) bekaul isu peranak Malaysia ke alai siku ari sida nya ari Sarawak ti tepekul pengelama dua bulan ba Lagos Nigeria nyentuk diatu.

Bekaul pekara nya, Uggah madahka iya udah telefon ngagai Menteri Pemansang Orang Dagang enggau Gerempung Kerejasama Datuk Seri Dr. Wan Junaidi Tuanku Jaafar ngambi berandauka chara mutarka penanggul tu.

“Datuk Seri Dr. Wan Junaidi deka mantaika pekara tu ngambi dikerandau ba kabinet enggau piak kami deka nganti pemutus bekaul mutarka penanggul tu.

“Utai ti dikeirauka kami diatu iya nya lebuh bisi rayat Sarawak napi penusah baka tu ba luar Sarawak.

“Perintah Sarawak sigi sedia meri bantu, ngelindung engggau bejalaika atur ke patut mutarka penanggul ti nyadi tu,” ku Uggah.

Uggah mansutka jaku nya ba aum pemberita ripot Covid-19 ba Begunan Dun Lama, ditu kemari.

Dulu ari nya, siti video ti dikerembai nengah media rama mantaika siku rayat Sarawak benama Malcolm Goh ari Kuching ti madahka diri tepekul ba Lagos Nigeria kenyau ari iya datai ba menua nya kena 7 Februari tu tadi.

Malcolm nengah video nya madah, lebih ari 30 rayat Malaysia ti tepekul ba Nigeria ketegal igi penyakit Covid-19 ti majak nambah ba menua nya ngujungka Perintah Nigeria bejalaika atur ngetuka semua operasyen bekaul nyengkaum operasyen ba padang bilun.

Terang iya, bemacham pengawa udah dipejalaika piak Duta Malaysia ba Nigeria ngambi ulih terebai ngagai menua tu tang pengawa nya nadai mantaika sebarang asil lebuh sida udah nganti dua bulan ke udah nyentuk diatu tang nadai chara nentuka sida ulih pulai ke menua.

AUM PEMBERITA…Uggah (tengah) benung nyaut tanya rambau Aum Pemberita di bekaul Covid 19 di Begunan Dun Lama, ditu kemari. Bela dipeda Dr Sim (kiba) enggau Dr Chin. -Gambar Ramidi Subari.