SARATOK: Peranak Krangan Rusa diatu matak seput lantang pengudah peminta sida deka bisi jematan baru nyadi nyata enda lama agi.

Sapit Menteri Kuasa enggau Pengeraja Asal ke mega Kaban Parlimen Saratok, Ali Biju diarika Pemesai Khas iya, Glen Anthony udah nyerahka taba projek Jematan Krangan Rusa ngagai peranak dia kena 29 Mei tu tadi.

Ku Glen, jematan baru ke meraka Sungai Krian ila ulih ditengah motosikal enggau entukar, nyilih Jematan Gantung (kayu) ke diatu.

“Pengari rayat kitai ba sitak Krian udah ngemendarka agih belanja penyampau RM1 juta dikena ngemujurka projek tu.

“Kitai ngarapka pemisi jematan tu ila, peranak ditu deka muntang agi mindah lebuh ngereja pengawa besehari sehari nyengkaum bejualka asil kebun sida,” ku Glen ngenataika jaku Ali.

Nambahka nya, jematan tu nyadi jalai penyambung peranak ke diau ba tanah seberai baka rumah panjai ba kandang menua Babang Krangan Rusa, Sekula Primari Babang lalu ngelawa Opis Pelilit Mit Nanga Budu.

Ba pengawa nasih tanah taba jematan diatur pagi tadi, Ali diarika ex-pengajar, William Barang disempulang bala pemesai bukai ari Palan Servis Parlimen Saratok enggau peranak dia.

PEMANSANG PEMUN… Jematan Gantung (kayu) deka diganti ngena jematan semin beungkus RM1 juta enda lama agi