KUCHING: Kaban Parlimen Lubok Antu, Tambat @ Jugah Muyang udah betemu enggau Menteri Besai Tan Sri Muhyiddin Yasin dikena mandangka sukung iya ngagai Perintah Perikatan Nasional (PN).

Nitihka penerang ari sebuah portal di menua tu, tuju Jugah betemu enggau Muhyiddin laban nyuaka surat pekat ti madah diri nyukung perintah PN enggau Muhyiddin.

Sama datai maya pengawa betemu enggau Menteri Besai tu iya nya Menteri Dagang Antarabansa enggau Industri Datuk Seri Azmin Ali enggau Sapit Menteri Kuasa enggau Pengeraja Asal, Ali Biju.

Nya alai tu ngujungka Parti Keadilan Rakyat (PKR) Sarawak diatu majak ‘lenyau bisa’ lebuh Sapit Presiden PKR Besai, Jugah Muyang ngaga pemutus ningkilka diri ari parti nya lalu pulai baru nyadi Kaban Parlimen ti ngatika diri.

Jugah nengah sebengkah penerang ke dibantai malam tadi nyemetak madah diri nyukung perintah PN enggau GPS ba Sarawak.

“Lebuh Pengawa Bepilih Besai Ke-14 (PRU14), aku bediri minta pilih ba Parlimen Lubok Antu nyadi chalun ngatika diri enggau menang laban sukung rayat.

“Pengudah PRU14, bala penyukung ngasuh aku nyereta PKR lalu aku nyereta parti nya ti nyadi entara parti ti numbuhka Perintah Pakatan Harapan (PH) lebuh nya,” ku iya.

Terang Jugah, Parlimen Lubok Antu nya sitak menua pesisir enggau beguna bantu sereta sukung perintah ngambi bejalaika pemansang ba dia.

“Aku berasai asa ngenang penyarut ke nyadi entara parti dalam PH enggau Menteri Besai ti ngujungka perintah PH tumbang.

“Aku mega nyukung Perintah GPS dipegai Datuk Patinggi Abang Johari Tun Openg ungkup pengelantang enggau pemansang rayat ba Lubok Antu,” tandu Jugah.