ENGKILILI: Siku pengereja serikat telekomunikasyen tekenyit lebuh entukar Toyota Hilux ditepan iya berasap lalu pansut api ba belakang enggau jampat nyerarai ngujungka entukar iya angus lengis.

Deriba ti beumur 34 taun nya ba rantau jalai ari Simanggang nuju Saratok laban bisi pengawa.

Iya madahka diri sedarka belakang entukar nya berasap lebuh mansa Bukit Marup enggau api jampat nganguska entukar iya.

“Aku lalu ngetu ba tisi jalai enggau nguji madamka api ngena kereban ngerara api tang enda mujur laban api jampat nyerarai nganguska entukar aku tu,” ku iya nerang, ditu tadi.

Raban Bomba enggau Penyah Penusah Sri Aman diuluka PBK II Freddy John lebuh ngesah endur penusah nya nyadi tepedaka api benung dipadam Raban Pemutar Penusah Ngenyit (ERT) Naim Gamuda (NAGA) JV Sdn. Bhd.

Udah nya, bomba mantu madamka api ngena hos ari kereban perengka pengangkut sida nyentuk api mujur dipadam lengis.

Operasyen madamka api ba entukar nya tembu pukul 11.50 pagi lalu deriba asal ari Semenanjung nya ditukuka nadai apa nama.