MATU: Sepengudah nyambut Gawai Dayak, sebuah rumah panjai Iban di pelilih Matu bisi ngatur sebengkah pengawa dikumbai Adat Nyimbah Menua dikena minta berekat lebuh ngulih ke jereki kelebih agi maya berikan.

Mandal Tuai Rumah Beruan Besai, Matu Daro, Ili Anak Gindan,57, madah adat tu dipejalaika sida seminggu udah ngelebus nyambut Gawai Dayak.

“Tuju kebendar kami bejalaika Adat Nyimbah Menua tu iya nya minta berekat kelebih agi ungkup pengawa berikan ba tasik enggau sungai,” ku madah ngagai pengarang berita, kemari.

Kelimpah rumah panjai Beruan Besai, rumah panjai Iban besemak ke bela agi ngemeranka adat tu iya nya rumah panjai di Tutus bela ba pelilih Matu.

Entara batang pengawa di sungai ke dipinta berekat tu baka mukat, nyala, ngetan bubu, enggau ke bukai dikena nambahka penatai pemisi diri sebilik.

“Peranak dua buah rumah panjai ke berimbai pendiau di Pelilih Matu tu sigi bepanggai ngagai asil ari pengawa berikan ba tasik tauka sungai dikena beridup”.

“Kami begiga ke ketam, undang, lokan, tekuyung enggau ke bukai kelimpah ari ngiga ikan,” ku iya.