Pelilih Saratok ari kelia enda kala pungkang ngadakan raban ti bepenau baik nya ari sukut pelajar, politik enggau mayuh ke bukai.

Sukut pemerindang serak tu sekali kitai bekelala enggau siku penanyi bujang mega siku ari komposer lagu tebilang Iban asal ari Rumah Dana,Temudok Krian Saratok.

Sapa enda ngelala Timothy Tranity Igu Anthony Julian beumur 29 taun tauka dikangau Igu Anthony ba dunya pemerindang. Iya diatu siku agi artis dibaruh perabung Kaban Musik Production (KMP) ti bepalan di Kuching.

Anak lumur dua ari tiga iku diri menyadi tu berengkah nujah dunya pemerindang ba taun 2016 nengah album kompilasyen Ngetan Panjuk Munsang lalu terus ‘meletup’ ditangkan lagu Merampau Beraie dirikod nengah Serikat Golden Pearl Recording Studio (GPRS).

Tranity mega ukai semina landik belagu tang chukup landik nebah kereban muzik baka Gitar Bass enggau Keyboard ti ngujungka iya suah diinjau nyereta raban pemain muzik tebilang baka Band Kumang Malaysia, Band Golden Pearl, Assapai Band, Sky High Band, Plunge In Band enggau Callis Band.

BEPERINDANG…Tranity nebah Keyboard ngiring penanyi Richard Lee maya merindang ba Bintulu.

Bekunsi berita manah enggau bala peminat iya madah, album baru iya dikumbai ‘Alah Laban Pengeraja’ ngundan lapan iti lagu nyengkaum lagu ‘hit’ Alah Laban Pengeraja, Dara Saratok, Nuan Berubah, Tawing Ujung Dunya, Puni Aku Enda,Semaya Tua, Labu Rendam Puak Kerapa enggau Joget Puntan Ba Jari Kumang ti disadang deka belabuh dijual ba kedai CD enggau VCD besemak enda lama agi.

“Nitih pelin asal album tu deka keluar nyerumba Hari Gawai Dayak taun tu (2020).

“Tang nadai ku enggau timpuh nya nyau dilanjar dulu ketegal penanggul pengerekai igi penyakit berampit Covid 19 diatu.

“Nya alai ngarapka bala peminat aku ulih besabar nganti ‘buah jari’ ari aku,” ku iya lebuh dirandau pemberita apin lama.

Rindu bemain kereban muzik (Keyboard) enggau ngarang lagu lebuh maya lepa ke mega siku ari orang ti gawa ke tasik nyimpan pengarap enggau juluk ati ulih nitih singkang penanyi Iban bukai selampur menua sereta nyaup ngangkat ke industri muzik enggau lagu Iban jemah.

Taja orang baru ba dunya pemerindang Igu Anthony naka tu kala nyereta pengawa melakun ba dua bengkah telemovie iya nya Telemovie Mikai enggau Cerita Kedai Kopi.

Kelimpah nya iya mega kala ngerikod lagu gawai begulai enggau bala penanyi GPRS.

Udah nya, iya mega bisi ngaga tiun lagu ungkup penanyi bukai baka Maryline (LUH Production) ba lagu Sarak Sebedau Jadi enggau Milih Menantu, Aku Ke Tasik Nuan Ke Laut (Duna Ranggau) artis Assapai Muzik Production sereta dua iti lagu ungkup penanyi Richard Lee (KMP) benama Pechaya ka Pangan Diri enggau Nubai Maya Gawai.

“Pengemar enggau penguji ba dunya pemerindang sigi mayuh lalu semina orang ti ‘bengal’ pending aja ulih beretan lama.

“Jaku petenah enggau penguji sempama baka ‘lauk’ ungkup sapa ti begelar penanyi tauka pemerindang.

“Tang semua nya udah nyadi lalu meri peneleba chukup beguna ungkup diri kelimpah genap penanyi meseti ngembuan pikir ti positif ngagai semua penguji ke bisi nyadi,”ku iya.

Kala apin laun,enggau tu mega aku deka meri besai terima kasih nuju bala bakih aku baka Hillary, Willie Jawie, Maxwell Franklin Saran, Wandie Ibrahim, Duna Ranggau, Ah Long, Cami Tan sereta Dunstan Piyet laban udah mantu aku enggau keranjai jari sida ba album Alah Laban Pengeraja.

“Terima kasih mega ke sukung enda leju ari bala peminat sekumbang nyadi penanyi sereta ngagai mandal tauke besai GPRS iya nya Jenarino Jeraki enggau Jenny Tan laban udah meri ruang sereta peluang ti chukup berega maya begulai lalu pia mega nuju KMP laban sanggup nerima aku nyadi siku artis baru baruh sida,”ku iya ngujungka randau enggau pemberita.

MERINDANG KIN KITU…Tranity (empat ari kanan) merindang begulai enggau Kumang Malaysia Band ba pengerami diatur sebengkah ejensi perintah di Kapit. 

 

NGETAN PANJUK MUNSANG….Album komplilasyen kepenudi dipasuk Tranity sebedau ngaul Serikat Kaban Musik Production.