KUCHING: Sarawak deka beratika baru projek ungkup timpuh panjai nipakka tagit nyadi nengeri mansang ba taun 2030.

Kepala Menteri Datuk Patinggi Abang Johari Tun Openg madah, tu siti ari kebuah Sarawak numbuhka Kaunsil Peransang Ekonomi Sarawak (SEAC).

Ku iya, penemu numbuhka kaunsil nya datai ari raban akademik, profesional enggau sektor peribit ngambi beratika strategi ekonomi pengudah Covid-19 nyentuk taun 2030.

“Berindik ari penusah dibai igi penyakit Covid-19 tu, kami ngasaika pelin asal dibaruh Langgur Pemansang Malaysia Lumpar Ke-12 (RMK12) enda engkeman agi berindik ari chara baru ti udah lalu deka ngubah rampa ekonomi menua kitai,” ku iya.

Nya alai ku iya, Sarawak meseti ngena chara ekonomi baru ungkup timpuh panjai nengeri tu enggau menua Malaysia empu.

“Kaunsil tu deka mansik enggau silik sepuluh kunchi sektor lalu nganjung pemutus pansik sida sereta perambu ngagai perintah nengeri ba bulan September tu,” ku iya.