KALA bala kita ninga pasal 1N5L Kek Lapis Premium?

Nyangka bala peminat kek lapis enggau sida ke rindu ngaga kek lapis ngelala sereta kala meli kek lapis ari 1N5L tu.

Kek lapis 1N5L tu suah ditapatka bala penguna ari selampur menua kelebih agi ba pelilih Bintulu tu.

LANDIK NENGKEBANG

Lily Jackson tu entara orang ti landik ngaga bemacham bansa kek lapis baka kek lapis Sweet Paddle Pop enggau kek Lapis Pua Kumbu sereta ke bukai.

Nama Lily Jackson majak dikelala enggau matak perati penguna sebelah media rama laban chukup landik ngaga kek ke mar digaga baka Kek Lapis Pua Kumbu.

Lebuh dirandau, Lily madahka diri rindu ngaga kek lapis tu kenyau ari sekula sekondari suba.

“Aku endang lama udah rindu ngaga kek lapis tu tang keran ngaga kek lapis nyadika dagang kenyau ari empat taun ke udah.

“Nyadi, ukir ba kek lapis tu endang ari penemu aku empu tang aku mega kala nyereta Kus Tatacara Pengendalian Makanan.

“Sebedau ngaga enggau nyual resipi kek lapis tu, aku mayuh ngaga pansik sereta ngambi chara ngaga kek tu ari kek lapis ti kala dipeda enggau diempa kitai besehari-sehari.

“Pengudah tembu mansik, aku lalu nguji ngaga kek lapis nya kediri empu.

NARIT ATI… Kek Lapis Pua Kumbu entara kek lapis ti dikerindu bala penguna laban bebida ari kek lapis ti kala digaga orang ngelama tu.

TIMBAL POSITIF

Terang iya, kelimpah ari ngaga enggau nyual kek lapis, 1N5L mega bisi nyual resepi kek lapis ungkup bala penguna ti rindu ngaga kek.

“Sebedau bisi resepi kek kediri empu, aku berengkah ari ngaga kek ti dikunsika orang nengah Facebook.

“Lebuh nya, aku nyual kek berega urung RM80 ngagai RM100 ungkup siti kek chuan penuh.

“Enti suba, aku semina ngaga kek lapis ti diudar bala kaban aja tang diatu, aku bisi ngaga resepi kediri empu bepelasarka pansik enggau asai ke mayuh udah diubah enggau bahan bukai,” terang Lily.

Naka diatu ku Lily, bisi 50 iti resepi udah digaga lalu entara resepi pemadu dikerinduka bala penguna iya nya Kek Lapis Pua Kumbu ke alai penerang nya udah dikunsi lebih ari 500 iku penguna Facebook.

Bup resepi tu udah bisi dijual ngagai bala penguna di Semenanjung Malaysia, Sabah, Sarawak, Brunei enggau Singapore.

“Laku amat bup resepi sekumbang PKP tu laban bala sida ke indu ti diau ba rumah bela ngerebut peluang nguji ngaga kek lapis tu.

Nambahka nya, Kek Lapis Paddle Pop mega entara kek lapis ti dikerindu bala penguna lalu kek ti nerima mayuh udar ari mensia mayuh diatu.

KELAS NGAGA KEK

NGIRI PENEMU… Lily benung ngajar bala penyereta sentang chara ngaga kek lapis premium lebuh ngatur Hand On Class ba sebengkah hotel di menua tu.

Facebook 1N5L Kek Lapis Premium diatu udah bisi lebih ari 6,000 followers.

“Sebedau Atur Tagang Pejalai (PKP) dipejalai kena 18 March tu tadi, 1N5L bisi ngatur Hand On Class ngaga kek ba sebengkah hotel di Bintulu, Sibu, Miri enggau Kuching.

“1N5L mega bisi ngatur personal class ungkup sida ti deka belajar chara ngaga kek lapis tu.

Lily madahka ukai muntang ngaul diri ba bidang ngaga kek lapis baka besemekih enggau bala pedagang bukai ti bedagangka kek lapis kelebih agi kek lapis Sarawak.

Ku Lily, lebuh PKP tu mega iya napi penanggul nganjung kek nengah servis pos kelimpah bisi sekeda endur enda ulih dianjung poslaju.

“Nya kebuah, kek lapis deka jampat bekulat sebedau datai ngagai bala penguna enti kek lapis enda dianjung nitihka timpuh ditetap.

“Kebuah pia laban kek lapis tu digaga ba rumah sereta nadai ngena utai bukai,” ku Lily nerang sentang pemar ba dagang kek lapis tu.

UNTUNG NIPAKKA PENGELELAK

Lebuh bejaku pasal untung ari dagang kek lapis tu, kira bisi dikena mulaika pengelelak diri empu ti kiruh ngaga kek lapis nangkup udar bala penguna.

Ambika banding, Lily mayuh nerima udar maya musim pengerami baka Gawai Dayak, Hari Raya enggau Krismas.

“Tambah mega, utai dikena ngaga kek lapis premium diatu majak mar.

“Ungkus ngaga siti kek lapis premium tu manggai beratus ringgit lalu nya mih kebuah kek lapis premium tu dijual mar ari kek bukai,” terang iya.

Tambah mega ku Lily, kek lapis premium tu digaga ba rumah aja ngujungka ita nadai tentu untung besai.

Sekumbang PKP tu, 1N5L tu ngaga enggau nerima udar ari bala penguna di Bintulu sereta menua bukai baka selama.

1N5L mega bisi nganjung kek ngagai Semenanjung enggau Sarawak nengah servis pos.

DAGANG ONLINE

Berebak enggau nya, 1N5L mega bisi ngajar chara ngaga kek lapis nengah online nengah Facebook, Whatsapp sereta Youtube Channel 1N5L Kek Lapis.

Ngelansa pasal ungkus ungkup dibayar siku penyereta, Lily madahka rm150 siku ungkup Hands On Class enggau video online.

“Bup resepi tu dijual aku berega RM100 siti lalu resepi nadai video nitihka bansa kek iya nya berega RM50 ke baruh.

Barang sapa ti deka nyereta tauka rindu ngaga kek lapis, kita tau ngelawa Facebook Lily Jackson empu enggau page 1N5L Kek Lapis sereta nengah whatsapp.