Bepelasarka statistik dunya, menua ke pemadu tinggi kes positif Covid-19 naka 10 June iya nya Amerika Syarikat bisi 2,045,715 kes, ditangkan Brazil (742, 084), Rusia (493,657), Sepanyol (289, 046) enggau Itali (276,583).

Di Asia Tengara, Malaysia ngerikod penuduk keempat pemadu tinggi kena penyakit ti iya nya lebih 8,000 kes. Menua ke pemadu atas iya nya Singapore bisi 43, 078 kes, ditangkan Indonesia (30, 988), Filipina (24,761), Thailand (3,995), Vietnam (371), Myanmar (314), Brunei (146), Kemboja (141) enggau Laos (20).

Diatu, Malaysia masuk renggat penyuman iya nya ngelepaska diri ari kerekai penyakit Covid-19 lalu disadang pulai manah baka selama udah 31 Ogos 2020.

Beduduk ari nya, perintah udah nempa Atur Tagang Pejalai Penyuman (PKPP) lalu berengkah dipejalai 10 June tu tadi dikena nukar Atur Tagang Pejalai Besyarat (PKPB) sebedau tu awakka menua enggau rayat ulih ngemeranka daya idup baka selama.

Ulih ke enda juluk perintah tu nyadi nyata? Pemutus nya semina ulih disaut nuan enggau aku nengah chara meri bekerejasama bela nitih Atur Pengawa Standard (SOP) ke udah digerah.

Entara aktiviti ke agi ditagang perintah di menua tu iya nya ngatur sebarang pekit lumba, lumba ti betegu, aktiviti ba pegung ai, pegung nyemerai sekalika ba rumah enggau ba palan dagang.

Taja pia bepelasarka Akta Industri Dagang Temuai 1992 (Akta 482) pekara tu ditendur ngagai atlit menua tu ke belatih ungkup Lumba Olimpik Tokyo 2020.

Udah nya, perintah agi nagang aktiviti dagang temuai ngagai menua luar ungkup peranak menua tu sereta enda ngemendarka temuai ari menua luar tama ngagai Malaysia.

Kelimpah nya, aktiviti ba palan karaoke, palan bemain anak mit ba endur bebelika barang sereta palan pemerindang ungkup diri sebilik.

Pia mega, aktiviti ba dalam pub enggau kelab malam mega bedau dikemendar tang tagang tu enda nyengkaum restoran ba dalam pub enggau kelab malam nya.

Udah nya, pengawa nyemaka gari ba bilik khas di kedai gari, ngujika perengka fesyen ba kedai enggu nyendiaka sampel penguji barang penganta ba kedai mega agi ditagang.

Kelimpah nya, perintah agi nagang semua aktiviti refleksologi enggau beurut ba palan pengerai enggau pemajik gamal.

Berebakn enggau nya mega, aktiviti kapal ti dikena raun mega bedau dikemendar nyengkaum sebarang aktivti ti nganggauka orang datai mayuh lalu ngujungka pengawa nyaga takah ba endur nya enda ulih jaga.

Nyadi nya mih semua atur ke agi ditagang lalu enda tau dilanggar ngapa bepelasarka Atur Nagang enggau Nyeliahka Penyakit Berampit (Ungkup Sitak Dirampit) 2020 (P.U. (A) 87/2020) baka ke udah digerah ninting hari.

Enti ditangkap piak bekuasa ngelanggar PKPP, dia orang nya ulih kena timbang ukum RM1000 tauka dijil enda ngelui enam bulan tauka napi kededua ukum nya.

Ungkup rikod naka 10 June tu tadi, penyampau kes kena rampit Covid-19 di selampur Malaysia bisi 8338 kes. Ari penyampau nya 7014 kes mujur suman lalu 118 kes dirikodka bebadi nyawa. Arapka kes aktif 1,206 di menua tu terus nurun.

Nya alai, ngarapka semua rayat di menua tu terus ngemeranka disiplin sereta nitihka PKPP ti udah digazet perintah awakka juluk menua merdeka ari Covid-19 ulih tejapai.