KUCHING: Petronas dikeandal deka mayar Chukai Jual enggau Servis (SST) ba produk petroleum ti digali ba menua tu penyampau RM2.8 bilion ba taun 2019.

Kepala Menteri Datuk Patinggi Abang Johari Tun Openg madah, Petronas meseti nitihka prosiding kort nyengkaum madamka apil bekaul pemutus Kort Tinggi Kuching sebedau mayar chukai SST tu.

“Kort Tinggi Kuching merintahka Petronas mayar SST 2019 bepelasarka hak dikembuan Sarawak di baruh Konstitusyen Perintah Besai, Sempekat Malaysia 1963 (MA63) enggau Ripot Komiti Entara Perintah (IGC) 1963.

“Berindik ari nya, Perintah Perikatan Nasional (PN) numbuhka siti komiti ti diketuai Ketuai Whip Gempung Parti Sarawak (GPS), Datuk Seri Fadillah Yusof enggau Menteri Wang, Senator Tengku Zafrul Tengku Abdul Aziz nyadi sebagi ari chara SST Petronas dibayar ngagai Sarawak,” ku iya.

Abang Johari mansutka jaku nya ba aum pemberita pengudah ngetuaika Aum Supreme KaunsilParti Pesaka Bumiputera Bersatu (PBB) ba Indu Opis PBB, ditu kemari.

Berebak enggau nya, Abang Johari ti mega Chairman GPS mantah ripot sebuah portal berita entarabansa jaku English lebuh madahka Petronas deka ngapil ba pemutus Kort Tinggi Kuching kena 23 June tu.

Abang Johari nyemetak madah, pengawa ngapil nya digaga sebedau Perintah Besai ti agi di baruh Pakatan Harapan (PH) betukar, tang diatu PN dekaka isu SST diputar jampat enggau minta Pteronas madamka apil nya.

“Petronas udah ngapil nya lebuh agi dipegai PH tang PN merintahka Petronas nitihka pemutus Kort Tinggi Kuching.

“Nya kebuah, kitai numbuhka Komiti Kereja di baruh Sapit Kepala Menteri Datuk Amar Awang Tengah Ali Hasan ngambi berandau enggau Petronas sereta Perintah Besai laban nya kuasa eksekutif,” terang iya.

Nambahka nya ku iya, di baruh kuasa undang-undang, Komiti Penyanding Penemu ditumbuh laban Sarawak deka ngaul ba industri minyak enggau gis di menua tu.

“Di baruh Komiti Penyanding Penemu, siti agi komiti ditumbuh iya nya Komiti Penyanding Penemu Kunsil Nengeri (Dun) ti diketuai Menteri Dagang Temuai, Seni enggau Main Asal Datuk Karim Rahman Hamzah ngambi berandau enggau Petronas pasal bayar SST produk petroleum di Sarawak.

“Pekara tu deka dipejalai laban Petronas diatu sanggup mayar SST 2019 enggau nitihka pemutus Kort Tinggi Kuching,” tandu iya.