KUALA TERENGGANU: Opis Menteri Dagang Dalam Menua enggau Pekara Penguna (KPDNHEP) nangkan mensia mayuh patut meresa enggau nentuka dulu ari piak bekaul sebedau meli produk bekaul enggau pengerai ke dijual kelalu murah.

Sapit Menteri iya, Datuk Rosol Wahid, madah entara nya kereban meresa pengangat tubuh digital ke dipadah bisi dijual kelalu murah dibanding enggau rega makit, kelimpah semina ngaminka atur ke udah ditetap iya nya Atur Pengawa Standard (SOP).

Ngaku piak sida sedar ke pekara nya, iya madah kes nya diatu benung diperati KPDNHEP ngambika diputar.

“Naka tu kami semina ulih meri lalau ngagai pedagang enggau penguna awakka meli ari kedai ke sah lalu dikemendar nyual perengka nya.

“Anang meli ari tauke ke enda dikemendar lalu tentuka perengka nya ngembuan chap Sirim Berhad (Sirim) dikena nentuka iya manah dikena,” ku iya rambau program penerit adat bekaul enggau Atur Tagang Pejalai Penyuman (PKPP) ditu kemari.

Rosol madah, KPDNHEP nadai ngembuan atur bukai bekaul enggau perengka pemeresa pengangat tubuh digital ke dijual murah nya.

Ku iya, mensia mayuh patut bisi penerang silik pasal kedai ke nyual perengka nya lalu enti nemu tauke nya nyual produk ke nadai bekualiti patut ripot terus ngagai KPDNHEP.

“Arapka anang meli perengka pemeresa pengangat tubuh digital ti kelalu murah dibanding enggau rega makit laban barang nya sigi nadai kualiti.

“Nya enda nitihka standard ke udah diletak dalam SOP PKPP laban perengka nya enda manah,” ku iya.