BARAM: Parti Sarawak Bersatu (PSB) meri bantu ngagai peranak rumah panjai Long Sela’an ke ditinggang penusah angus apin lama ke udah.

Ba siti penerang dibantai kemari, Adun Ba’ Kelalan Baru Bian madahka PSB Mulu bisi nganjung bantu pemakai ngagai peranak rumah panjai nya.

“Sehari tu menyadi kitai Paul Michael Paran enggau kaban ke bukai ngarika Profesor Dr Son Radu ari PSB Mulu nyuaka bantu pemakai ngagai menyadi kitai di Kampung Long Sela’an ke ditinggang penusah angus apin lama ke udah,” ku penerang dipansutka iya ba facebook iya.

Kelimpah ari nya, semua bantu pemakai nya dianjung terus ari Indu Opis PSB di Kuching.

Ba lansa ke sama, PSB Telang Usan mega bisi nyuaka bantu ngagai peranak rumah panjai nya.
Bantu nya disuaka ngagai pengari rumah panjai nya, Jenny Lo ti nerima bantu ari pengari PSB Telang Usan, Catherine Jok.

Ku Catherine ba penerang facebook iya kemari, sida meri terima kasih ngagai semua orang ke udah meri lalu ngemujurka pengawa meri bantu ngagai peranak rumah panjai nya.

Apin lama ke udah, rumah panjai 13 pintu bilik nya nyau deka angus abis urung pukul 11.07 pagi.

Nitihka penerang ari Opis Bomba enggau Penyah Penusah Malaysia (JPBM) Sarawak, berindik ari penusah angus nya, bisi 12 pintu bilik ba rumah panjai nya enggau sebuah balai raya angus.

Taja pia nadai penusah bebadi nyawa diripot nuntung peranak rumah panjai

NGELEMPUNGKA PENUSAH… PSB Mulu nyuaka bantu pemakai ngagai peranak rumah panjai Long Sela’an apin lama ke udah.