KUCHING: Tadika di Sarawak dikemendar ngepunka baru operasyen sida berengkah 1 Julai tu.

Sapit Kepala Menteri ti mega nyadi Chairman Komiti Penyangga Penusah Ngenyit Nengeri Sarawak (JPBNS) Datuk Amar Douglas Uggah Embas madahka Opis Menteri Pengintu Pengelantang Pendiau, Komuniti, Orang Indu enggau Pemansang Anak Mit (KWKPK) udah mantaika Standard Atur Pengawa (SOP) dikena muka tadika nya.

“Taja pia, SOP nya diatu benung dialuska agi lalu SOP ke silik ulih ditemu ari KWKPK,” ku iya.

Uggah madah munyi nya ba aum pemberita Covid-19 di Begunan Dun Lama ditu, tadi.

Nangkan nya ku iya, SOP nya mega deka dibantaika Menteri KWKPK empu, Datuk Seri Fatimah Abdullah sehari tu (16 June).

Lebuh dirandau bekaul enggau peresa pengerai ngagai pengajar Tadika sebedau ngepunka baru operasyen sida, iya nandu SOP nya deka dibantaika piak KWKPK.

Ungkup rikod, Tadika kala diasuh nutup operasyen sida lebuh Atur Tagang Pejalai (PKP) lalu dilanjarka agi lebuh Atur Tagang Pejalai Besyarat (PKPB).

Taja pia, lebuh menua mansang suman sereta likun mimit ari igi penyakit Covid-19 rambau Atur Tagang Pejalai Penyuman (PKPP), piak JPBNS meri pemutus ngemendarka tadika beoprasyen baru baka selama ba nengeri tu.