KUCHING: Parti Sarawak Bersatu (PSB) udah sedia penuh napi Pengawa Bepilih Besai Negeri (PRN) enggau Pengawa Bepilih Besai Parlimen (PRU).

Mandal Presiden iya, Dr Johnical Rayong Ngipa madah, jentera parti diatu udah masuk ‘gear lima’ sereta nganti sebarang maya aja endur nurun beperang.

“Iya, kitai PSB diatu amat udah sedia penuh enggau sebarang pengawa bepilih besai ti deka diatur lalu kitai chukup andal ulih menang mayuh penuduk sereta numbuhka perintah baru di Sarawak.

“Nya alai, kitai bela besampi ngarapka pandemik Covid-19 terus suman di menua tu ngambika ulih ngemujurka semua program ti deka diatur.

“Kebuah pia laban mayuh program ke udah dilanggur kitai sebedau tu tejanggal beduduk ari pengerekai penyakit Covid-19 sereta Atur Tagang Pejalai (PKP) ke dikemeran perintah di menua tu,” ku iya.

Ketuai Nembiak PSB ke mega chalun PSB di Dun N. 33 Engkilili tu madah munyi nya lebuh dirandau Suara Sarawak sentang penyikap parti napi PRN tauka PRU ti deka datai, ditu sehari tu.