KUCHING: Penyampau tubuh besembiang ba gerija tauka rumah sembiang ukai Islam enda tau ngelui ari 100 iku.

Pekara nya berindik ari Opis Penyangga Penusah Ngenyit Nengeri Sarawak (JPBNS) ti ngemendarka rumah sembiang ukai Islam dibuka berengkah 20 June tu.

Sapit Kepala Menteri ti mega nyadi menteri ti megai tanggungpengawa Unifor Datuk Amar Douglas Uggah Embas nyemetak madah, semina rumah sembiang di baruh Missionary Societies Ordinace 1967 (Sarawak Cap. 106) tauka digazet Kaunsil Ngintu Pengelantang Ukai Islam di baruh Charitable Trust Ordinance 1994 tauka ngerejister enggau Opis Pengerejister Gerempung Malaysia (ROS) di baruh Akta Pertubuhan 1996 (Akta 335) aja dikemendar dibuka baru.

Unit Pekara Pengarap Bukai (Unifor) mansutka penerang nya pengudah beratika pengawa nyaga takah satu meter dalam rumah sembiang.

“Sida ke bisi tabin, batuk tauka sendat seput enggau anak mit beumur 12 taun ke baruh enda dikemendar besembiang ba gerija tauka rumah sembiang ke bukai.

“Sida ke sakit raya kelebih agi orang tuai dilalau ngambika seruran bejaga enti sema ngulu sembiang ke gerija,” ku penerang nya, tadi.