KUCHING: Pemadas Kuan Chee Heng tauka dikangau Uncle Kentang nerima puji enggau terima kasih ari mensia mayuh berekat ari penyiru iya ke chukup besai reti nya.

Dalam akaun media rama iya sehari tu, Uncle kentang mega meri terima kasih ngagai Orang Sarawak enggau mensia mayuh ti udah ngenang pemanah iya.

“Nadai ibuh kira pemesai pengawa ke digaga kami, enti kita tepedaka kes baka tu…nyema kita ulih, aku pechaya kita mega deka ngereja pekara ke sebaka enggau utai ke digaga kami ngambi iya ulih datai ba padang bilun.

“Enda patut kitai deka ngelakka iya bedarat. Duit RM200 nya enda ibuh dibayar pulai. Nya pemeri pengasih ari kami. Kasih ga meda nangika iya nadai makai enggau ngirup laban nadai duit,” ku iya.

Dulu ari tu, Ales Lutas Anak Lenggeng asal ari Sarawak mutus ati bedarat ari Selayang ngagai KLIA ketegal putus pengawa berindik ari Atur Tagang Pejalai (PKP) dipejalaika Perintah ngambi nagang pengerekai Covid-19 ba Malaysia kenyau ari 18 March tu tadi.

Nembiak lelaki nya mutus ati pulai ke menua pengudah putus pengawa laban kilang endur iya gawa udah badu beoperasyen kenyau ari tiga bulan ke udah.

SIRU NGAGAI ORANG TUSAH… Uncle Kentang (kanan) udah nulung siku anak Sarawak ti nguji bedarat ngelawa padang bilun (KLIA) ketegal ti suntuk belanja dikena mayar tambang teksi tauka bas ari Selayang, Selangor.