KUCHING: Kaunsil Komiti Indu PBB meri sukung ti penuh ngagai Kepala Menteri (KM) Datuk Patinggi Abang Johari Tun Openg ngaga pemutus ba renggat Perintah Besai.

Ketuai Komiti Indu PBB Datuk Seri Fatimah Abdullah madahka, Abang Johari ti mega Presiden PBB orang ti deka bejaku bagi semua komponen parti dalam Gempung Parti Sarawak (GPS).

“Kepala Menteri mega Chairman GPS lalu kitai nyukung penuh kuing penemu iya.

“Kebuah pia, laban gaya (atur) kitai dalam PBB ti nadai bechiping ati ngagai ketuai parti lebuh diatu parti diiring Abang Johari,” ku iya.

Iya bejaku munyi nya lebuh ditanya pemberita pasal ulah Presiden PKR, Datuk Seri Anwar Ibrahim ti bebendar deka betemu enggau Kepala Menteri ngulihka sukung GPS dalam numbuhka perintah baru lalu muai Perikatan Nasional (PN) pengudah nyadi chairman ba aum Kaunsil Komiti Besai Indu PBB ba Indu Opis PBB ditu, kemari.

Taja pia, pejalai Anwar ti deka betemu enggau Abang Johari di Kuching kena 16 June tu tadi puntan ngujungka chalun Menteri Besai kesemilan nya lenyau sukung majoriti.

Pia mega, pekara nya diaku dalam siti penerang begulai entara DAP enggau Amanah nengah Direktor Komunikasyen Khalid Samad enggau Sekretari Organisasyen Menua Anthony Loke Siew Fook.

Kenu ku penerang nya, jalai kepenudi Anwar ngulihka sukung GPS puntan lalu timpuh ke ditetapka sida mega udah abis ti ngujungka iya nadai bulih sukung.

“Beduduk ari nya, kitai arapka chara ngulihka sukung nengah jalai kedua ulih digaga baka ti udah diaum laban pengawa digaga PN nyata udah ngenataika pengerusak ngagai intitusyen enggau pekara wang menua,” ku penerang begulai nya.

Jalai kedua iya nya nganjung nama Tun Dr. Mahathir Mohammad nyadi Menteri Besai enggau Anwar nyadi Sapit Menteri Besai.