KUCHING: Serakup Pengajar Sarawak (STU) merambu minta pengawa muka baru prasekula di Sarawak ditangguh nyentuk maya ke nyengala likun.

Presiden STU Macky Joseph madah, pekara nya diperambu laban piak sida irau bekaul engggau Atur Pengawa Standard (SOP) ba raban anak mit.

“Kebuah pia laban sida nyangka pedis deka nitihka SOP sepanjai maya, enti ukai pengawa beraban tentu sida kediri.

“Ulah bala nembiak prasekula deka balat kena pangka ari pekara tu laban sida rindu amat bebakih enggau pangan diri,” ku iya madah nengah sebengkah penerang sehari tu.

Tandu iya, pekara nya mega deka ngachau runding sida.

“Pekara ke pemadu beguna, enti kelas disambung baru bala anak ulih neruska pelajar tang mayuh pekara ke patut dikemerat awakka sida enda kena rampit penyakit ba sekula.

“Nya alai, pengajar ngesan tanggungpengawa ke besai nentuka bala anak nitihka SOP ke udah ditetap piak opis menteri enggau sekula,” ku iya.

Iya madah, pekara nya deka nentuka bala pengajar balat kiruh ba kelas ungkup pengawa ngajar.

“Kami ngasaika bala pengajar deka mayuh agi awak merati laly nyaga bala nembiak ba prasekula.

“Nya alai, STU minta opis menteri bekaul berunding baru baka ni bala pengajar ba sekula ulih nitihka SOP ke udah ditetap,” ku iya.