BELAGA: Empat pintu rumah ba Uma Aging, Baru, Belaga angus lengis sempama baka penusah ‘karam di darat’.

Kepala Opis Bomba enggau Penyah Penusah Bintulu madah, sida bisi nerima berita penusah nya ari Opis Polis Pelilih Belaga.

“Nitih ke ripot ari Raban Bomba Volunteer (PBS) Belaga, penusah nya nyadi urung pukul 9 pagi lalu sida nerima berita nya 10 pagi,” ku iya ba siti penerang ditu tadi.

Ku iya, nitih ke penerang ari Abu Talip Pengerusi PBS Pekan Belaga, sida lalu ngesah penusah nya sepengudah ke nerima berita.

“Lebuh ke datai, Raban PBS enggau mensia mayuh ke bisi datai semina madam ke bara api laban rumah nya udah angus lengis,” ku iya.

Nambah ke nya, nadai bisi orang diripotka bakal tauka bebadi nyawa lalu pun penusah nya ke nyadi agi dipansik.