BINTULU: Kaban Parlimen (MP) Bintulu Dato’ Seri Tiong King Sing ngaku pengilap diri sereta minta ampun berindik ari laya iya enggau siku indu ke dikerembai ba sebelah media rama kena Hari Enam ba Kidurong Avenue, Jalai Pesisir Pantai Bintulu-Samalaju, Hari Enam tu tadi.

Ku iya, perkara nya nyadi semina besengki jaku aja lalu nadai tuju ke bukai kelebih agi seduai iya bekelakar jaku lebuh deka ngaga projek ngaga parit ba endur nya.

“Tuju ati aku semina deka madah berindik ari projek ngaga parit tu deka ngagai genturung pendiau dia enda kena ampuh bah agi,” ku iya.

Tiong mansut ke jaku nya ba siti penerang berita ditu kemari.

“Tu ukai sengaja tang bai ati ti ringat ninga jaku iya lalu aku minta ampun ngagai semua kelebih laban besai jaku didinga lebuh kami duai ke betalat,” ku iya.

Tiong bisi bendar penesal ati ketegal nadai kerejasama ari indu nya lebuh niat iya deka nyungkak ke pengelantang pendiau peranak genturung dia awakka badu kena penusah bah.

Berebak enggau nya, iya madah Opis Parit enggau Gentali Ai (DID) enggau sida ari Opis Pelilih Bintulu mega kala ditagang indu nya lebuh sida deka ngaga parit dia.

Kebendar, kebuah indu nya nagang laban utai tanam iya kena pansa parit ke digaga nya taja pan tanah ke endur iya betanam nya endang tanah perintah iya nya ba Perumahan Kidurong Avenue.

“Pun petalat tu nyadi lebuh indu nya ngujan enggau jaku sereta mega bisi nyakap lalu mantai ke duku,” ku iya.

Nangkan ke nya, Tiong sekali agi minta ampun lalu ngarap ke pekara nya nyadika lalau.

Nambah ke nya, laki indu nya mega bisi minta ampun ketegal ulah ke udah digaga bini iya.

Enggau nya, Tiong bisi bendar pengarap ati semua piak ulih meri kerejasama ba projek ti digaga perintah ke sama mai penguntung enggai pengelantang pendiau semua orang.