KUCHING: Bantu Khas Indai Tunggal (BKIT) sebagi ari inisiatif dibantaika Menteri Besai Tan Sri Muhyiddin Yassin ba Pelin Penyuman Ekonomi Timpuh Pandak (Penjana) kena 5 June tu tadi.

Menteri Muda Orang Indu, Ruang Bilik enggau Pemansang Anak Mit Rosey Yunus, madah, bantu tu deka meri pemaik ngagai 8,057 indai tunggal ke udah rejister ba Opis Pengintu Pengelantang Mensia Mayuh (JKM).

Ku iya, sida mega sedarka agi tubah indai tunggal ba menua tu apin rejister ba opis bekaul.

“Nya alai, kami minta sida ke apin rejister ba JKM tau datai ngelawa opis nya enggau lengkas nentuka sida ampit bantu khas tu.

“Sida diperansang nganjung peminta bantu sekali beri penyampau RM300 tu sebedau 31 Oktober,” ku iya.

Rosey madah munyi nya ba aum pemberita pengudah aum khas BKIT Opis Pemansang Orang Indu (JPW) enggau Opis Orang Indu enggau Ruang Bilik Sarawak (JWKS) di Wisma Wanita, tadi.