KUCHING: Bala Ketuai Komuniti enggau Palan Servis Komuniti selampur Sarawak dipinta bekerejasama ngemuntangka pengawa meri Bantu Khas Indai Tunggal (BKIT) ba menua pesisir.

Direktor Bagi Pengatur Polisi Orang Indu Opis Pemansang Orang Indu (JPW) Ahmad Syaifulizan Zulkeefly, madah, mayuh penanggul diperati kelebih agi rayat nengeri tu tebal agi diau ba menua pesisir.

Ku iya, sida napi penanggul ngenataika bantu laban nadai arus internet enggau perengkaguna dikena bala indai tunggal ngisi pom peminta BKIT.

“Nya alai kami udah berandau enggau Opis Menteri Pengintu Pengelantang Pendiau, Komuniti, Orang Indu enggau Pemansang Anak Mit (KWKPK) besaup gawa ngambi pengawa muntang agi dikereja.

“Nengah kerejasama semua piak ari JKM Nengeri nyentuk JKM pelilih menua, raban indai tunggal muntang agi ngisi peminta sida lalu pengawa meri BKIT mega deka lanchar,” terang iya.

Syaifulizan madah munyi nya lebuh dirandau pemberita pengudah aum khas BKIT Opis Pemansang Orang Indu (JPW) enggau Opis Orang Indu enggau Ruang Bilik Sarawak (JWKS) di Wisma Wanita, tadi.