Enti deka nyadi orang ti landik bejaku enggau berandau kitai meseti ngemeranka basa tauka adat.

Nengah chara ngemeranka adat ti baka tu, dia kitai tentu ulih nyaga pemanah nama diri sekalika berandau ruai, ngatur pengawa rasmi tauka bejaku ba mua mensia mayuh.

Enti kitai bisi basa enggau orang, dia orang tentu rindu begulai sereta bebasaka kitai. Kekini aja penunga pejalai nadai orang enda rindu bebakih enggau kita.

Ari nya, pengidup kitai enda berasai sunyi sereta enda bangat rungu ensing laban bisi baka bakih meransang, bisi orang nyukung sereta endur bekunsika sebarang penanggul ke bisi nekul pengidup.

Nya alai, anang enda ngemeranka basa enggau sebarang aja orang ti berandau enggau kitai, sekalika berandau enggau kaban tauka munsuh.

Lebuh maya kitai bekunsika pengasai ati diri enggau bala bakih. Kitai meseti lurus ati nusika utai ti diasaika kitai. Ambika banding enti kitai berasai nyima, padah terus terang. “Aku berasai ensiban.”

Anang madah diri enda ensiban, tauka ringat. Enti kitai bisi berasai ringat. Sebut aja, “Aku ringat.” Pia mega enti ati kitai ‘enggai tauka enda setuju’, padah aja “Aku enggai.” Anang ngansak pangan tauka mejal.

Udah nya, kitai enda tau bejaku munyi ke nuduh kaban. Anang ngena leka jaku dek. Seliah diri bejaku munyi tu “Jaku dek ngasuh ati aku pedis.” Nama kebuah jaku munyi nya patut diseliah?

Jaku munyi nya kelalu berupai nuduh orang salah sereta ngujungka kitai pedis ati tauka enda berasai lantang. Pia mega jaku ti nyebut “Dek ke ngasuh aku pindah pengawa” tauka nuduh orang salah sereta ngujungka sesebengkah pemutus ke udah digaga kitai. Pekara nya semina ngasuh kaul kitai enggau pangan diri nyadi silau sereta kekadang sampai tepansutka jaku ti jai.

Bisi maya kitai begulai enggau orang ti ngemeratka prinsip ti sebaka. Ambika banding kitai orang Kristian ke udah mansau ba pengarap. Sida tu entara orang ti balat ngemeratka ulah pendiau ti lurus sereta betul. Lebuh bejaku sida enda sengapa sembur sereta balat ngembuan ati ti nelap. Jaku ti pansut ari mulut sida ukai ungkup diri tang bepelasarka pemaik enggau dikena negu pengidup orang ngambi bela teulihka pengidup ti meruan.

Udah nya, ba maya ti enda disadang maya ke berandau enggau pangan tauka kaban. Tusi utai ke amat. Anang bula. Anang mayuh utai ditambah tauka netak sekeda ari penerang ke beguna ditemu orang. Anang meritaka utai ti salah.

Pia mega, anang sesekali ngembuan niat deka nipu enggau ngayahka orang bukai ketegal deka beambi ulih.

Belajar badu bejakuka orang enggau ngetu nempa petenah. Enti bisi ninga orang bukai bejaku pasal orang bukai, kitai patut jenuh, diau diri anang nempelah sida. Enti ulih rara sida ‘membawang’ munyi ku jaku orang ke maya hari tu tang meseti enggau chara ti betul awak ke sida enda ringat.

Utai ke disebut kitai kebendar patut sama enggau ulah pendiau kitai. Enti mulut kitai nyebut “ya,” anang ngilingka pala. Enti mulut madah, “enggai,” anang mih ngulurka jari lalu nyengkau.

Pia mega, nyempelah orang ke benung bejaku. Tejuka dulu orang abis bejaku, nya baru kitai mansutka penemu diri.

Udah nya, maya orang rindu berandauka sesebengkah topik, anang kitai nyelepak limpang nyebut utai bukai ke nadai kaul enggau batang pekara ke dikerandau.

Kelimpah ari nya, kitai anang mayuh ulah ngachau orang ke benung bejaku. Pendingka aja penemu sida enggau nyinuk. Anang begendang pah tauka mayuh utai digaru lebuh berandau manah enggau bala bakih.

Maya ke berandau patut seliahka ngenang pekara ke enda manah. Anang kelalu mayuh sebana tauka ngangkaika pengurang orang bukai. Utai ke patut iya nya ngaku sereta bebasaka penemu kaban.

Ba dunya tu kebendar orang ke beberita iya nya orang ke pemadu mayuh meli saham insurans rama. Kekini aja sida bejalai, orang tetap berasai berutang budi enggau sida. Nya kebuah lebuh sida tu dituntung penusah, sida enda bangat kelalu tusah ati laban seruran bisi kaban ngesah tauka mantu.

Anang enda ingat, dunya diatu majak berubah kaban belayan enti udah jai jaku enggau kitai ulih dipeda baka orang bukai lalu orang bukai enti manah enggau begulai tau diambu nyadi ke kaban tauka menyadi. Nya alai, jaga basa lebuh bejaku enggau semua orang.