PASAI: Enda lebu lelak nurun berikan semalam-malam pengudah bulih ikan tapah pemerat 56 kilogram (kg) dini hari tadi.

Lee Sana, nembiak ari Rumah Iboi Gelana, Sungai Pasai di Lubuk Pelaie ditu madahka pengaga ati enda ulih ditiu ngena leka jaku pengudah pengelelak tebalas enggau jereki ti enda disadang.

Ku iya, ngelama tu sida serumah ke nurun berikan ba ai Pasai suah bulih ikan Tapah tang enda ngemesai nya.

“Kami duai meaya ke nurun bemain ba ai demalam enda ngadang diri chukup bidik bulih ikan Tapah ngemesai tu.

“Engka tu mih dikumbai orang jereki beri petara pengudah lama nadai nurun kereja ke tasik ketegal penusah besai ke nuntung menua diatu,” ku Lee lebuh dirandau Suara Sarawak pagi tadi.

JEREKI… Lee begambar enggau ikan tapah pemerat 56kg ke diulih ginti iya dini hari tadi.