KOTA SAMARAHAN: Taman D-Virtual beungkus RM13 juta dibuka ngagai mensia mayuh tang penyampau tubuh deka ditatak.

Ketuai Pemesai Eksekutif Serba Dinamik Group Bhd Datuk Abdul Karim Abdullah madahka chara ti ditetapka ngagai taman tema keterubah di Borneo nya engkeman enggau Standard Atur Pengawa (SOP) pengerai enggau pengelikun berindik ari Atur Tagang Pejalai Penyuman (PKPP).

“Penyampau mensia mayuh ti datai ngagai endur tu deka ditatak ari sebedau atur nya ditetapka ba selampur menua.
“Tang diatu kami muka baru endur tu ngena mayuh macham SOP pengelikun enggau pengerai ngagai mensia mayuh,” ku iya.

Abdul Karim madah munyi nya lebu bejaku ba pengawa begulai enggau media di Taman D-Virtual ditu, ensana.
Ku iya, nengah atur nya, mensia mayuh deka dipinta ngena sengkabung mua lebuh masuk ngagai premis nya lalu nyaga takah enggau pangan diri.

Kelimpah ari nya, bala staf taman nya deka ngatur sereta matau mensia mayuh nyengkaum pengawa berintai, ngena kereban ba endur nya sereta ba kafe.

RINDU ATI…Raban media benung ngujika main ke bisi disedia ba Taman Main Digital, Virtual Park, Kota Samarahan apin lama ke udah. – Gambar Ghazali Bujang

“Mensia mayuh meseti meli tikit dulu ngambika enda ibuh berintai ba mua pintu masuk sebedau masuk ngagai endur tu, lalu meseti scan kod QR ngambika ngemuntangka pengawa nyidi,” ku iya.

Ungkup rikod, Taman D-Virtual berengkah dibuka ngagai mensia mayuh berengkah ari pukul 10 pagi ngagai 10 malam.

Taman D-Virtual bejalaika operasyen ba begunan semilan blok tiga ringkat lalu ngembuan 10 bansa main dikumbai ‘virtual reality’ (VR).

Entara main bukai ke bisi ba endur nya nyengkaum VR Speed ​​Cruiser, VR Quad Squad, VR Gyrate, VR D’Battleship, VR Knight Rider, VR Giant Slide, VR Trekker, dan VR Gatling Gun, enggau Enchanted Chamber.

Kelimpah ari nya, mensia mayuh ti rinduka main internet baka eSport tau ngasaika main nya ba eSports Center enggau main skrin Hologram Teater ti ngena langkar ti revolusyen tu sinematik.

Palan ti nagit penemuai mensia mayuh berumur entara 15 ngagai 45 taun nya mega nyendiaka endur baka SD X Studio, SD X FabLab, SDX-Arena, GiGA Virtual-Cafe enggau D-Tamu.