MIRI: Pemidang niang Sub Inspektor Ngalinuh Bala, 79, siti pengelenyau besai ngagai menua kitai, ku Sapit Speaker Dun, Datuk Gerawat Gala.

Iya madah munyi nya maya ngarika Kepala Menteri, Datuk Patinggi Abang Johari Tun Openg enggau Perintah Sarawak nyengai lalu meri basa kepenudi ngagai niang Gerija Sidang Injil Borneo (SJB) Bukit Kanada ditu kemari.

Kenu ku iya, niang Ngalinuh endang siku ari 30 iku peranak Malaysia ke kala nerima midul Seri Pahlawan Gagah Perkasa (SP).

“Iya nerima midul nya ari Yang di-Pertuan Agong Kelima Al-Marhum Sultan Abdul Halim Mu’adzam Shah ibni Al-Marhum Sultan Badlishah kena 6 Julai 1972.

“Iya siku ari dua penerima SP Sarawak kepenudi ke agi idup kelimpah bala bakih ke bukai ti betempuh ngelaban komunis kena taun 1972 iya nya Encik Enti Bijam ke bela datai ditu meri basa kepenudi ngagai bakih iya,” ku iya.

BASA KEPENUDI…Gerawat benung ngenataika jaku ngagai mensia mayuh nyerumba pengawa sembiang sereta meri basa kepenudi ngagai niang ba Gerija Sidang Injil Borneo (SJB) Bukit Kanada ditu kemari.

Gerawat madah, jerita sida betempuh ngelaban komunis iya nya maya pejalai nganjung kereban bom ngagai sebuah palan ngali di Jalai Ulu Oya, Sibu iya nya sida kena serang raban komunis ngenyit.

“Penyampau sida maya nya enda mayuh lalu sida bisi bakal kena timbak bala munsuh, Ngalinuh enggau bakih iya tetap mujur ngalihka munsuh.

“Tu mandangka sukut pemerani sida betempuh, ketegal chukup sayauka menua maya nya,” ku iya.

Kelimpah nya, Gerawat mega madah Perintah Sarawak deka nirika tugu dikena ngingatka niang ba Taman Bujang Berani di Kuching.

“Atur pengawa khas deka diatur lalu diperambu diatur ba Kuching lalu sida sebilik deka dikangau,” ku iya.

Iya nandu, niang Ngalinuh deka terus dikenang nyadi bujang berani enggau kah bansa Orang Ulu, Dayak enggau selampur rayat Sarawak.

Bela datai maya nyengai niang ex-Sapit Kepala Menteri Sarawak Tan Sri Alfred Jabu, enggau bala temuai dipebasa ke bukai nyengkaum Ketuai Polis Sarawak Datuk Aidi Ismail enggau ex- Panglima Medan Timur Tentera Darat Mejar Jeneral Datuk Stephen Mundaw.

Ngalinuh midang ba Sepital Miri ketegal penyakit diabetes sereta penanggul lempuang, kena pukul 6.47 lemai 23 June tu tadi.

Pemidang niang ninggalka balu iya, Sinah Ngalinuh Bala, 73, lima iku anak enggau semilan iku uchu enggau siku ichit.