KUCHING: Gerempung Pengajar Bumiputera Sarawak (KGBS) minta semua pengajar di Bumi Kenyalang nyukung pengawa ngintu Hari Pengajar Renggat Nengeri Sarawak bepun 30 June nyentuk 3 Julai tu ila.

Presiden KGBS Ahmad Malie madahka ketegal pangka igi penyakit Covid-19, Hari Pengajar tu ila deka diintu ngena chara online.

“Kami arapka semua sekula ti bisi internet ulih ngatur sesyen khas endur sida sama-sama nitihka Pengerami Ngintu Hari Pengajar ti deka diatur nya ila.

“Ketegal Covid-19, kitai semina ngaga pengerami nya nengah online,” ku iya nengah siti penerang, kemari.

Tambah Ahmad Malie, KGBS endang ngarapka bala pengajar deka nyukung semua aktiviti ti udah ditusun PPD Kuching enggau kerejasma ari PPD Padawan, PPD Bau sereta PPD Lundu ti udah bebendar merambu deka ngintu hari nya.

Iya mega madahka rambai jaku ‘Berguru Demi Ilmu, Bina Negara Bangsa’ endang engkeman dikena ngenang jasa bala pengajar dalam pemansang sektor pelajar di Bumi Kenyalang ngelama tu.

Hari Pengajar Renggat Nengeri Sarawak deka diintu pagi 30 Jun bepun 8.30 pagi nengah online.