KUCHING: Anang enda ingat ke penatai diri taja jauh bejalai ke menua orang, pia ku pesan indai iya Nara Bunsu, ke seruran dikeingat Wesley Juntan tiap kali nurun belelang ke menua orang.

Kenu ku pramugari Malaysia Airline ke beumur 33 taun nya, pesan indai iya pandak tang besai reti ngasuh iya seruran betanya ba ati diri reti dalam jaku nya.

“Pengudah nembuka pelajar ba Universiti Malaysia Terengganu, aku pindah ke Kuching lalu gawa nyadi pengajar ganti ba Sekula Sekondari (SMK) Tunku Abdul Rahman.

“Aku agi ingat maya nya suba, bisi tebachaka iklan pasal pengawa puang nyadi pramugari ke dipandangka Malaysia Airlines ba sebuah surat kabar dalam menua lalu nya balat meransang aku terus nguji nasip.

“Munyiku sempama jaku Melayu tuah manuk ulih dipeda ba kaki, tuah mensia sapa ulih nemu. Enda memukai aku pas intebiu nya lalu ngujungka aku diasuh gawa ba Kuala Lumpur.

APAI INDAI…Wesley begambar kenang enggau apai seduai indai iya.

“Aku nemu genap jereki ke diulih nya meseti datai ari menua asal lalu indai aku mesan awakka anang mudah enda ingatka penatai asal diri,’ ku iya.

Wesley nembiak Iban asal ari Sekuau, Sibu madahka pesan indai iya nya nyadi peransang iya lalu ulih nyadi peransang nembiak rebak baru dudi hari.

Berebak enggau nya, iya madah sekumbang Atur Tagang Pejalai (PKP) ke dipejalai kenyau March tu tadi meri penemu baru ngagai iya nempa utai ke ulih meri pangka besai ngagai orang bukai pasal penatai diri, lebih agi sentang komuniti Borneo (Sabah enggau Sarawak) ari nya iya mujur ngaga agum Barbie ti ngena bemacham pekayan asal di Borneo.

“Sarawak endang sebuah menua ke diuan mayuh suku bansa enggau kaya adat. Nya alai, pekara nya meransang aku nempa agum Barbie tu lalu ditipak enggau ngepan tradisional ari sekeda etnik di Sarawak.

“Projek tu ukai semina ulih mandangka pengerindu aku tang mega dikena ngelakuka adat komuniti Borneo ngagai peranak menua luar.

KREATIF…Chunto agum barbie ke digaga Wesley ngembuan motif pekayan sekeda komuniti di Borneo.

“Aku ngarap projek tu nyadi peransang ngagai nembiak rebak baru ngelala pasal adat asal komuniti Borneo,” ku iya.

Kenu ku Wesley, tu ukai keterubah iya nempa agum Barbie tang iya kala nempa agum Barbie sereta agum bukai nengah pramugari Barbie, bengepan kebaya Malaysia Airlines.

Kelimpah ditipak enggau set kebaya Malaysia Airlines, pramugari agum Barbie mega dipasukka ngepan Air Asia, Qatar Airways enggau Malindo Air, ke bela dijual enggau rega RM200 nyentuk RM350.

Kenu ku iya, dikena nempa agum ke manah ukai pengawa ke muntang tang chukup mayuh pemar.

Taja pia, semua pengawa nya enda berasai, lebih agi asil nyual agum tu laku amat sereta nerima mayuh peminta.

KREATIF…Chunto agum barbie ke digaga Wesley ngembuan motif pekayan sekeda komuniti di Borneo.

Tandu Wesley, iya deka nambahka 12 igi agum Borneo baka Kumang Barbie ke pemadu dikerindu penguna nyengkaum iya empu laban disikap enggau Sugu Tinggi chukup manah dipeda.

“Tu entara pekara ke chukup meri pemar laban aku beratika chara ngaga aksesori nyau deka sebaka enggau sais Barbie. Ba pekara tu, aku patut mandangka ngagai bala orang ke landik dikena nentuka pendiau ngepan nya betul.

“Selalu iya, aku nguna awak dua ngagai tiga gari ngaga agum laban nya begunaka perengka seni enggau kereban ke mayuh.

“Aku benasip amat, laban bisi siku petunggal ke ulih mantu aku ngias agum Kumang enggau Keling.

“Aku ngena agum Barbie ke tulin digaga ari Mattel, dijual enggau rega RM350 ngagai RM650, bepanggai ngagai pemanah ngepan,” ku iya madah ngagai New Sarawak Tribune.

Kenu ku Wesley, rega agum keling mari agi dibanding enggau agum bukai laban proses ngaga perengka tu pedis iya disikap enggau sangkuh, terabai sereta ilang.

Iya mega madah diri kala bulih gelar Keling rambau Pekit Raban Ngepan Iban taun nyin kemari, madah peneleba nya nyadi peransang endur iya ngangkatka anak penemu diri.

Ngelansa pasal perambu dudi hari, Wesley madah iya deka ngena ngepan asal bansa bukai baka Dayung Sangon Barbies ti versyen Muslimah nitihka peminta penguna.

“Tang naka tu aku semina fokus ngagai perengka ke dikemisi naka tu,” ku iya.

Barang sapa deka meli tauka ngudar agum Barbie ari Wesley, ulih ngelawa Instagram @wesleyhilton tauka Facebook iya (Wesley Hilton).