KUCHING: Kaban Parlimen Santubong Datuk Seri Wan Junaidi Tuanku Jaafar meri jamin ngagai peranak Lundu pasal kesemua projek besai ti ditangguh ba baruh konsituensyen iya deka bepun digaga enggau lengkas.

Wan Junaidi ti mega Menteri Pemansang Orang Dagang enggau Gerempung Kerejasama madahka, projek nya laun ketegal Atur Tagang Pejalai (PKP) bepun 18 March dikena nagang pengerekai igi penyakit Covid-19.

“Kereja kunteriktor ditangguh sepengelama tiga bulan ti enda kala nyadi sebedau tu dikena nagang pengerekai igi penyakit nya.

“Aku arapka semua peranak di Lundu mereti sereta sabar enggau pengelaun tu, tang aku ulih madahka projek tu deka pulai baka selama enggau lengkas,” ku iya lebuh dipinta bejaku sentang kompelin mensia mayuh bekaul enggau tangguh kereja kunteriktor maya iya ngelawa palan projek Sungai Rambungan ke beungkus RM98 juta di Lundu kemari.

Berebak enggau nya, iya nyangkal penemu ti madahka Perintah Sarawak udah nadai duit, ku iya projek-projek tu ditangguh laban peminta nyambung baru kereja kunteriktor semina dikemendar dalam Atur Tagang Pejalai Penyuman (PKPP).

Kenu ku iya, anggap ti baka nya digaga enggau nadai berundingka krisis pengerai ke nuntung jam ke diatu ti enda ulih diseliah.

“Semua aktiviti kereja kunteriktor semina ulih beroperasyen maya PKPP kelimpah meseti nitihka standard atur pengawa (SOP).

“Bagi aku empu, bisi maya aku empu nurun padang ngagai pelilih aku empu dikena meresa pemansang kereja kunteriktor. Pia mega, aku udah berandau enggau pemesai Opis Kereja Raya (JKR) ngambika sida seruran nusi pasal pemansang projek nya naka ni,” ku iya.

Wan Junaidi mega madahka dua projek jematan besai di Lundu entara projek ti udah dikinsilka Perintah Besai maya Pakatan Harapan (PH) megai perintah.

“Pun suba projek nya disetuju perintah Barisan Nasional (BN) tang udah nya lalu dikinsilka perintah PH ketegal BN alah ba pengawa Bepilih Besai ke-14.

“Tangguh projek Sungai Rambungan mega ketegal kami nganti raban injinir enggau juruteknik ti beasal ari menua China,” ku iya.

Projek Rambungan sebagi ari semilan projek jematan meraka sungai besai ti nyendiaka rentayan jalai pesisir Sarawak ke udah bisi, ti nyengkaum 896 kilometer ari selatan ngagai wilayah utara.

Penguna jalai alun diatu agi bepanggai ngagai servis feri nyema deka nyemerai sungai lalu feri di Rambungan kediatu nerima urung 2,800 buah motokar sehari.