KUCHING: Penembu Jalai Sungai Maong ke Segedup ba pun taun 2022 deka nentuka pejalai lebih muntang sereta likun ungkup peranak ti diau ngelingi Segedup, Sungai Maong enggau Satok.

Sapit Kepala Menteri Tan Sri Datuk Amar James Masing madah, projek ti beungkus lebih RM28 juta tu deka meri pemaik ekonomi rama ngagai komuniti nyengkaum pemanah ari sukut pemansang.

“Jalai tu deka nyadi jalai altenatif ngagai sida ti diau ba sitak nya lebuh mindah ke bukai kelebih agi ngagai sepiak utara Kuching,” ku Masing.

Masing mansutka jaku nya ba Pengawa Nasih Tanah Projek Jalai Sungai Maong ngagai Segedup ti dipenyadi Kepala Menteri Datuk Patinggi Abang Johari Tun Openg, ditu tadi.

Sama datai Menteri Kereja Raya Datuk Seri Fadillah Yusof, Menteri Kaunsil Kandang Menua enggau Pengawa Berumah Datuk Seri Dr Sim Kui Hian, Menteri Muda Pemansang Palan Penyangkai Kapal enggau Infrastruktur Datuk Julaihi Narawi enggau Sapit Chairman Parti Pesaka Bumiputera Bersatu (PBB) Satok Datuk Ibrahim Baki.

Ku Masing ti mega Menteri Pemansang Palan Penyangkai Kapal enggau Infrastruktur, batang tuju projek nya dikena nyambung dua genturung pendiau iya nya Kampung Sungai Maong enggau Kampung Segedup kelimpah ngemanah urung 600 meter jalai genturung pendiau dia.

Terang iya, jalai ti diperambu nya bepun ari jalai puntang ba Jalai Datuk Temenggong Tan Meng Chong.
“Jalai pemanjali urung 3.60km tu mungkur pengawa ngaga dua jematan semin meraka Sungai Maong (80 meter) enggau Sungai Pedada (54 meter).

“Pia mega, Kampung Sungai Maong diperambu deka disambung enggau jalai baru pemanjai 69 meter,” tandu iya.