SELANGAU: Bantu Projek Mit Pemansang Menua Pesisir (MRP) di baruh Projek Nyeleti Rumah Seranta Sarawak (PPRMS) bagi sitak Kunsil Nengeri (Dun) Tamin ditampung.

Kaban Kunsil Nengeri (Adun) Tamin Christopher Gira Sambang madah, nya sebagi ari inisiatif Perintah Sarawak dipegai Gempung Parti Sarawak (GPS) mantu raban ti tusah.

“Kitai udah nyuaka bantu berumah baka batu bata, simen, pasar enggau batu ngagai peranak Rumah Gerinsa 21 pintu ba Sungai Sebaya, apin lama ke udah.

“Pia mega, bantu musik mega disua ngagai Rumah Anthony Amit 15 pintu ba Sungai Buloh, Selangau,” ku iya nerang lebuh dirandau pemberita, ditu kemari.

Ku iya, pengawa ngaga rumah nya deka dipejalai peranak rumah panjai empu ngena chara beripai.

“Dikearap bantu tu ulih ngelempungka tating penusah peranak rumah panjai tu,” ku iya.

Gira madah, bisi sekeda peminta bantu MRP-PPRMS ari rumah panjai bukai ba Dun Tamin.

“Taja pia, sida bedau nerima bantu nya laban kitai agi nganti agih belanja baru.

“Aku ngarapka sida besabar laban bantu nya ditampung baru ba Dun Tamin,” ku iya nerang.

Kelimpah ari PPRMS, Gira madah bisi 40 Program Transfomasyen Menua Pesisir (RTP) benung dipejalai enggau agi ditinda.

“Aku mega ngarapka bala kunteriktor enggau ejensi pengatur projek deka nembuka projek RTP tu nitihka perambu ti udah ditetap,” tandu iya.