KUCHING: Sarawak andal nadai bepanggul napi Pengawa Bepilih Nengeri (PRN) ke deka datai, pia ku Datuk Abdul Karim Rahman Hamzah.

Sapit Presiden Parti Pesaka Bumiputera Bersatu (PBB) madah, sida nadai penanggul enggau udah nyikap diri napi PRN sekalika PRN diatur taun tu tauka taun baru.

“Kami besedia napi PRN taja bisi piak engkechit kin kia.

“Aku beratika ketuai Perintah Gempung Parti Sarawak (GPS) chakah amat gawa lalu udah tentu bisi pekara ulih dikemanah kitai.

“Tang enti beratika semua pekara, aku ngasaika kami udah gawa enggau manah,” ku iya.

Karim ti mega Menteri Dagang Temuai, Seni enggau Main Asal mansutka jaku nya ba aum pemberita beserimbai enggau ‘DayakDaily’s D’Drift 2020 Flag-Off Ceremony’, ditu kemari.

Terang iya, komuniti mega berasai gaga laban mayuh projek dipejalaika Perintah Sarawak taja ngena belanja diri ba projek ti patut dipejalai Perintah Besai.

“Ambika banding, baka sekula repuk, jalai alun enggau klinik.

“Pekara nya di baruh Perintah Besai tang sida enda bejalaika tanggungpengawa nya.

“Nasip amat kitai bisi chukai jual minyak enggau gis ke alai kitai bulih asil RM2 ngagai RM3 bilion setaun enggau nya endang untung besai dikena bejalaika pemansang ba menua tu,” terang iya.

Ba lansa sama, lebuh ditanya enti sema Pengawa Bepilih Besai (PUR) enggau PRN dipejalai sama, iya madahka diri enda ulih mantaika penemu diri pasal pekara tu.

“Tang ungkup PRU ke deka datai, enti Menteri Besai ngenyit ngaga pemutus madamka Parlimen enggau enti Kepala Menteri Datuk Patinggi Abang Johari Tun Openg deka ngatur PRN, manah agi dipejalai sama.

“Kebuah pia laban kitai bisi timpuh pandak kurang ari setaun, enti PRU ngenyit diatur ba timpuh enam tauka tujuh bulan ke deka datai, nyangka manah agi kitai sama ngatur PRN,” ku Karim nerang.

Ngelansa pasal PRU iya madah, nitihka Konstitusyen, PRU meseti dipejalai tiap lima taun tauka lebuh Menteri Besai tauka Kepala Menteri ngasaika sida meseti ngulihka mandat baru.

“Nya alai, pengawa bepilih deka nyadi lalu ukai bereti enda ditemu tang tu mih chara pemadu manah ngulihka mandat baru,” tandu Karim.