Anak Iban begawai di Hawaii

KUCHING : “Bejalai betungkatka adat, tinduk bepanggalka pengingat”,nya mih sempama Iban ti ngembuan besai reti ungkup etnik Dayak ti jauh gawa ba menua bukai.

Ba sebarang endur sida diau, adat enggau main asal nya nyadi identiti sida ngambika pesaka bansa Dayak enda midang diserunyut arus pemansang dunya.

Siku peranak menua tu benama Jackson Saga, 27 taun ti udah 11 taun diau ba Laie, Hawaii madahka nya ukai kedalih iya enda ngerami Gawai enggau bini iya, Cathrine Kushalini Vijayakumar, 28 taun asal ari Ipoh, Perak enggau diatu lebih ari dua taun udah jadi melaki bini.

Tu taun keempat iya enda ulih ngerami Gawai ba Sarawak lalu nya mih penguji ti diasaika iya laban ngiga penemu enggau pengelandik ba menua orang.

“Pemansang teknologi kemaya hari udah ngenyemakka takah enggau diri sebilik kelebih agi lebuh ngintu Pengerami Gawai tu.

MAKAI SERUMPU… Jackson ngangauka bala kaban iya makai serumpu ngambi ngerami Gawai ba Laie.

“Taja pia, ati mengkang sinu enda ulih mulaika diri ngintu Gawai enggau diri sebilik lalu ngabang ngagai kaban belayan makai bemacham bansa pemakai kitai Iban baka manuk pansuh, sup manuk gulai daun jabang enggau pemakai bukai.

“Ukai semina pemakai, tang bemacham bansa kuih deka dinah ngagai bala pengabang lebuh ngerami Gawai baka penganan jala, kuih chuan enggau kuih ke bukai.

“Taja diau ba menua orang tang aku mengkang ngerami Gawai ba menua Hawaii.

“Ninting taun, kami duai bini aku deka nyumai lauk ti suah disumai ba Sarawak tang enda sama asal laban kurang utai digulai dalam lauk nya enggau kurang kereban dikena nyumai,” ku iya ngelansa.

Terang Jackson, iya enggau bini iya deka ngaga resepi lain agi ari ngelama tu tang agi ngemeranka identiti Malaysia.

Nambahka nya, seduai deka ngangauka bala kaban ngambi sama beserumpu makai.

Jackson ti asal ari Rumah Asin, Sebakong Mukah madah, ketegal Covid-19, Gawai taun tu dirami bansa Dayak nengah chara bebida laban semua orang dipinta diau jenub ba rumah enggau enda ulih ngabang ngagai bala bukai.

Tang ku iya, ngarapka utai ke nyadi diatu deka pulai baka selama ngambika kitai ulih ngerami Gawai baka taun ke udah.

“Ngagai kami sebilik enggau bala kaban ba Sarawak, Gawai tu pengerami ti nyerakup enggau meri pengelantang ungkup semua kitai.

“Empat taun aku udah enda ulih ngerami Gawai ba menua diri lalu aku berasai sinu laban enda ulih pulai ke menua tang ungkup pengelikun semua, kitai anang pulai ngambika orang ti dikesayau kitai ba menua semampai likun belama,” ku iya ti madahka diri kala pulai ke Malaysia bulan Ogos taun nyin kemari.

Ku iya, Perintah ba Hawaii udah neritaka Atur Tagang Pejalai iya nya Diatu tauka Gawa ba Rumah nyentuk diatu sekumbang pengerekai Covid-19 ba serata dunya.

“Tang, semina servis bekaul aja ulih nurun gawa lalu bisi sekeda nengeri ditu nutup padang bilun domestik enggau entarabansa sida ungkup pengelikun,” ku iya ti nampung pelajar ba Brigham Young University of Hawaii ba kus Pengurusan Perhotelan dan Pelancongan lalu mega gawa din.

Ungkup rayat Malaysia ti sama enda ulih pulai, Saga ngelalau semua kita berundingka pengelikun diri enggau enti ulih anang merambu deka nemuai ngagai menua tauka pelilih bukai.

“Anang guai pulai ke Malaysia tauka palan bukai nyentuk penusah ti nyadi tu udah berinsur manah,” ku iya nangkan.

PEMATAK TEMUAI… Pulau enggau palan pematak ti bisi ba Hawaii ke suah endur seduai melaki bini ngelantangka ati.

 

Suara Sarawak